HOT NEWS
Main menu
adv
ဒေါ်လာတစ္ဆေ ဝေလေလေ နင် ဘယ်ကိုင်းမှာနေ

ဒေါ်လာတစ္ဆေ ဝေလေလေ နင် ဘယ်ကိုင်းမှာနေ

ယခင်ရက်များက တရိပ်ရိပ်တက်လာခဲ့သော အမေ ရိကန် ဒေါ်လာဈေးမှာ ယနေ့ (ဒီဇင်ဘာ ၂ဝ ရက်)တွင် တစ်ဒေါ်လာလျှင် မြန်မာကျပ်ငွေ ၁၃၇၅ ကျပ် ဖြစ်ခဲ့သည်။ ယခု နှစ်ကုန်ပိုင်းတွင်  မြန်မာကျပ်ငွေ တန်ဖိုး ကျဆင်းပြီး ဒေါ်လာငွေဈေးမှာဖြင့် စံချိန်တင် အမြင့်ဆုံးနှုန်း ဖြစ်လာသည်။ ငွေကြေးဈေးကွက်တွင် မှတ်တမ်းများအရ ယခုနှစ် ဒီဇင်ဘာမတိုင်မီအထိ သမိုင်းတစ်လျှောက် အမြင့်ဆုံး ဖြစ်ခဲ့သော ငွေလဲနှုန်းမှာ ၂ဝဝ၇ အောက်တိုဘာလက တစ်ဒေါ်လာ လျှင် ကျပ် ၁,၃၇ဝ အထိ ရောက်ရှိခဲ့ခြင်းဖြစ်သည်။


ဘတ်ဂျက်လိုငွေများခြင်း၊ ကုန်သွယ်မှုလိုငွေပြခြင်း၊ နှစ်သစ်တွင် စတင်တော့မည့် ကားမူဝါဒသစ်အရ ဒေါ်လာဝယ်စုသော လုပ်ငန်းရှင်များလာခြင်း၊ အမေရိကန်ဒေါ်လာကိုယ်တိုင် နိုင်ငံတကာ ငွေကြေးဈေးကွက်တွင် ပို မာလာခြင်း၊ ပြည်ပသို့ ပို့ကုန်ရငွေအများစု နိုင်ငံအတွင်းသို့ ဝင်မလာဘဲ ပြည်ပဘဏ်များသို့ ရောက်ရှိနေခြင်း၊ အိမ်ခြံမြေကဏ္ဍတွင် ရင်းနှီးမြှုပ်နှံသူများ ဒေါ်လာဝယ်စုလာခြင်းစသော အချက်များမှာ ဒေါ်လာတန်ဖိုး တက်စေသော အကြောင်းအရာများ ဖြစ်သည်။ ထို့အပြင် ဒေါ်လာတန်ဖိုး ဆက်တိုက်တက်နေ ခြင်းမှာ ပုံမှန်ဈေးကွက်၏သဘောထက် ငွေကြေးဈေးကွက် မတည်မငြိမ်ဖြစ်စေရန် ဒေါ်လာဈေးကစားနေသူများ ရှိနေ သည်ဟူသော သုံးသပ်သူများလည်းရှိသည်။ ဒေါ်လာဈေးတက်သည့် အကြောင်းတရားများစွာ ရှိနေသော်လည်း စံချိန်တင်အမြင့်ဆုံးနှုန်းဖြစ်လာသည်ကို ကြည့်ခြင်းအားဖြင့် အစိုးရသစ်အနေဖြင့် စီးပွားရေးနှင့် ပတ် သက်ပြီး လုပ်ဆောင်ချက် မအောင်မြင်ခြင်းကို သက်သေထူပြနေသလို ဖြစ်နေသည်။


စီးပွားရေးပညာရှင် ဦးလှမောင်က ''ဒေါ်လာဈေး ဒီလောက်ထိ တက်သွားလောက်အောင် ထိန်းချုပ်နိုင်စွမ်း မရှိဘူး။ ဒါမှမဟုတ်ရင် တစ်ယောက်ယောက်က နှောင့်တာကို သူတို့ ကာကွယ်နိုင်စွမ်းမရှိဘူး။ ဒီတော့ စီး ပွားရေးလုပ်တာ သိပ်ပြီးတော့ မလုပ်တတ်ဘူးပဲ ဆိုကြပါစို့''ဟု ဝေဖန်သည်။ လက်ရှိအနေအထားများအရ ဒေါ်လာဈေးကျဆင်းရန် လုပ် ဆောင်မှုများရှိသည်ဆိုသော်လည်း အနည်းငယ်သာ ကျဆင်းနိုင်မည်ဟု ပညာ ရှင်များက ရှုမြင်ကြသည်။ ဒေါ်လာဈေးတက်ခြင်းကြောင့် ကန်စွန်းရွက်မှအစပြု၍ အခြေခံ စားသောက်ကုန်များနှင့် လူသုံးကုန်များအားလုံး လိုက်ပါဈေးတက် နေပြီဖြစ်သည်။ သယ်ယူပို့ဆောင်မှုတွင် မော်တော်ယာဉ် စက်သုံးဆီဈေးမှာ နိုင်ငံခြားငွေဈေး ဂယက်ကြောင့် တစ်လအတွင်း တစ်လီတာ ကျပ် ၅ဝ မှ ၆၅ ကျပ်ကြား ရာခိုင်နှုန်းအားဖြင့် ခုနစ်ရာခိုင်နှုန်းကျော်မှ ၁ဝ ရာခိုင်နှုန်းကျော်အထိ မြင့်တက်လာသည်။


ဒီဇင်ဘာတတိယပတ်တွင် ဖြစ်ပေါ်သော စက်သုံးဆီ လက်လီ ဈေးများမှာ နိုဝင်ဘာ တတိယပတ်တွင် ဖြစ်ပေါ်ခဲ့သော ဈေးနှုန်းနှင့် နှိုင်းယှဉ်ပါက ဒီဇယ်တစ်လီတာ ၆၅ ကျပ် ( ၁ဝဒသမ၃၁ ရာခိုင် နှုန်း)၊ ပရီမီယံဒီဇယ် တစ်လီတာ ကျပ် ၆ဝ (၉ဒသမ၂ ရာခိုင်နှုန်း)၊ အောက်တိန်း ၉၂ Ron တစ်လီတာ ၆၅ ကျပ် (၁ဝဒသမ၂၃ ရာ ခိုင်နှုန်း)၊ အောက်တိန်း ၉၅ Ron တစ်လီတာ ကျပ် ၅ဝ (၇ ဒသမ ၂ ရာခိုင်နှုန်း) တစ်လအ တွင်း မြင့်တက်ခဲ့ခြင်း ဖြစ်သည်။ ထို့ကြောင့် ရန်ကုန်မှ နယ်မြို့များသို့ ကုန်စည်များတင်ပို့ရာတွင် သော်လည်းကောင်း၊ နယ်မြို့များမှ ဒေသထွက်ကုန်များအား မြို့ကြီးများသို့ တင်ပို့ရာတွင်သော်လည်းကောင်း သယ်ယူ ပို့ဆောင်စရိတ် ကြီးမြင့်လာသဖြင့် ကုန်ပစ္စည်းဈေးနှုန်းများပါ လိုက်ပါမြင့်တက်ရခြင်း ဖြစ်သည်။ မြန်မာကျပ်ငွေ တန်ဖိုးကျခြင်းသည် ငွေကြေးဖောင်းပွမှုကို ပိုမိုဖြစ်ပေါ်စေပြီး၊ ယင်းအကျိုးဆက်အဖြစ် ကုန်ဈေးနှုန်းများ လည်း တက်လာသောကြောင့် ပြည်သူအများစု ဆင်းရဲဒုက္ခ ရောက်သွားနိုင်သည်။ အထူးသဖြင့် အခြေခံလူတန်းစားများ၊ အောက်ခြေနှင့် သာမန် ဝန်ထမ်းများ၏ စားဝတ်နေရေးကို ထိခိုက်စေမည်ဖြစ်သည်။

 

''ဝန်ထမ်းတို့၊ ပုဂ္ဂလိကဝန်ထမ်းတို့၊ လက်လုပ်လက်စားတို့ဆိုတာ ပုံမှန်ဝင်ငွေပဲရှိတယ်။ အဲဒီသူတွေအကုန်လုံး ကုန်ဈေးနှုန်းတက်လာရင် စားမလောက်၊ ဝတ်မလောက် နေဖို့မလောက် ဖြစ်လာမယ်။ စားသောက် ကုန်တွေ ပိုပြီးဈေးကြီးသွားတဲ့အတွက် စားသုံးသူ ပြည်သူလူထုအကုန်လုံး ဒုက္ခရောက်သွားနိုင်တယ်ပေါ့''ဟု စီးပွားရေးပညာရှင် ဦးဇော်ဖေဝင်းကဆိုပြန်သည်။ လက်ရှိ သာမန်ဝန်ထမ်းတစ်ဦး၏ လစာမှာ ကျပ်တစ် သိန်းမှ တစ်သိန်းခွဲအထိ ရရှိနေခြင်းဖြစ်ပြီး၊ နယ်မှလာရောက်လုပ်ကိုင်သူအတွက် အဆောင်ငှားရမ်းခစရိတ် ကျပ်လေးသောင်းခွဲကုန်ကျသည်။ ''လစာက တစ်နှစ်ကြာလို့ တစ်ခါတိုးတာမဟုတ်ပါဘူး။ နှစ်နှစ်ေ လာက်ကြာမှ အလွန်ဆုံးတိုးလှ ငါးသောင်းလောက်ရယ်။ ဒါပေမဲ့ ကုန်ဈေးနှုန်းက အကြောင်းအမျိုးမျိုးနဲ့ တရိပ်ရိပ် တက်နေတာ။ ဒီတိုင်းဆိုရင်တော့ ဝန်ထမ်းတွေအတွက် ခြိုးခြံြေ>ွခတာရမယ်ဆိုတာ ထက် လုံးဝကို ခြွေတာမှရတော့မယ်လို့ ပြောရတော့မယ်''ဟု ပုဂ္ဂလိကဝန်ထမ်း မအိမွန်ကျော်က ဆိုသည်။ ဒေါ်လာဈေးကြောင့် ဝန်ထမ်းများနှင့်  အခြေခံလူတန်းစားများ စားဝတ်နေရေး ကျပ်တည်းနိုင်သကဲ့သို့ပင် လုပ်ငန်း ရှင်များအတွက်လည်း လုပ်သာကိုင်သာမရှိသည့် အခြေအနေသို့ ရောက်ရှိနိုင်မည် ဖြစ်သည်။


ဆောက်လုပ်ရေးဈေးကွက်ကိုကြည့်လျှင် အိမ်ဆောက်ပစ္စည်းများအနေဖြင့် သဲတစ်ကျင်းလျှင် ပျမ်းမျှကျပ် ၁ဝဝဝ ခန့်၊ ကျောက်စရစ် တစ်ကျင်းလျှင် ကျပ် ၃ဝဝဝ ခန့်၊ ဘိလပ်မြေတစ်အိတ်လျှင် ကျပ် ၂ဝဝ ခန့် ဈေးမြင့် သည်။ စက်သုံးဆီဈေးနှုန်းများ မြင့်နေဆဲဖြစ် သောကြောင့် ဆောက်လုပ်ရေးသုံးပစ္စည်းများပါ ဆက်လက်မြင့်တက် နိုင်ခြေရှိကြောင်းလည်း ကောင်းကင်စံ အိမ်ဆောက်ပစ္စည်းအရောင်းဆိုင်မှ ဦးအောင်ဇော်လင်းက သုံးသပ်သည်။  ယင်းလုပ်ငန်းများအနေဖြင့် ယခုနှစ်အတွင်း အထပ်မြင့်အ ဆောက်အအုံများ ကန့်သတ်လိုက်ခြင်း၊ ကန်ထရိုက်များမှလည်း တိုက်ခန်းများအား ဆက်လက်မဆောက်လုပ်တော့ဘဲ ပြန်အပ်ခြင်းများ ရှိ ခဲ့သောကြောင့် ဆုံးရှုံးနစ်နာမှုများရှိလာချိန်တွင် အသုံးပြုရသည့် ပစ္စည်းဈေးနှုန်းများ မြင့်တက်လာရာ ရင်းနှီးမြှုပ်နှံစရိတ် ပိုမို မြင့်မားလာသည့်ဒဏ်ကို ခံနေကြရသည်။ ထိုနည်းတူ ဒေါ်လာဈေး မြင့်တက်လာခြင်းေ ကြာင့် ပြည်တွင်း တင်သွင်းရောင်းချသည့် စက်သုံးဆီများလည်း တင်သွင်းရခက်ခဲနေ ကြောင်း စက်သုံးဆီ တင်သွင်းရောင်းချသူများထံမှ သိရသည်။


စက်သုံးဆီ တင်သွင်းရောင်းချသူများအသင်း အတွင်းရေးမှူး ဒေါက်တာဝင်းမြင့်က ''ဒီနေ့အမြတ်တင်ပြီးရောင်းတဲ့ဈေးက နောက်နေ့ကျတော့ ဒေါ်လာဈေးတက်တော့ အရင်းတောင်မရတော့ဘူး ဖြစ်သွားတယ်။ေ တ်ာတော် အခက်အခဲဖြစ်နေပါတယ်''ဟု  ပြောပြသည်။ အမေရိကန်ဒေါ်လာဈေးနှုန်းများ မြင့်တက်ခြင်းသည် စီးပွားရေးအတွက် ကောင်းမွန်သည့်အရာတစ်ခုမဟုတ်ဘဲ သွင်းကုန်ကိုသာ အဓိကအားထားနေရ သည့် မြန်မာနိုင်ငံအတွက် ယင်းကုန်ပစ္စည်း ဈေးနှုန်းများ မြင့်တက်ခြင်းဒဏ်ကို များစွာရင်ဆိုင်လာရနိုင်သည်။ ယခုပင်လျှင် ပြည်ပနိုင်ငံများမှ တင်သွင်းရသည့် လူသုံးကုန် နှင့်စားသောက်ကုန်အများစုသည် မူလရောင်း ချနေသည့်ဈေးထက် အနိမ့်ဆုံး ကျပ် ၃ဝဝ မှ အမြင့်ဆုံး ကျပ် ၈ဝဝ အထိ ဈေးတက်နေပြီ ဖြစ်သည်။  လူသုံးများသည့် ကုန်ပစ္စည်းများဖြစ်သော ကိုယ်တိုက်ဆပ်ပြာ၊ သွားတိုက်ဆေး၊ နို့ဆီ၊ ဆပ်ပြာမှုန့်၊ ခေါင်းလျှော် ရည်များနှင့် ပြည်ပ ထုတ် အချိုရည်များ အဓိကဈေးတက်လာခြင်းဖြစ်သည်။ အထုပ် သေး ၁ဝဝ ပါသည့် ဆပ်ပြာတစ်အိတ်လျှင် ယခင် ကျပ် ၈,ဝဝဝ မှ ယခုအခါ ကျပ် ၈,၈ဝဝ သို့ ဈေးတက်လာသည်။


ထိုသို့ ဈေးနှုန်းများ မြင့်တက်ခြင်းကြောင့် မဖြစ်မနေ ဝယ်ယူမှု လောက်သာ ရှိလာကာ ကုန်ရောင်းအားများလည်း ထက်ဝက်နီးပါး ကျဆင်းသွားကြောင်း ကုန်စုံဆိုင်အသိုင်းအဝိုင်းမှ သိရသည်။ ယင်းအပြင် နိုင် ငံခြားငွေဖြင့် ဝယ်ယူရောင်းချရသည့် ဟန်းဆက်ဈေးကွက်တွင် ရောင်းချသည့်ဈေးနှုန်း အနည်းငယ်မြင့်မားလာ ခဲ့ကြောင်း ဟန်းဆက်ဈေးကွက်အတွင်းမှ စုံစမ်းသိရသည်။ အဓိကအားဖြင့် Xiaomi ဟန်းဆက်များနှင့် iPhone များတွင် ဈေးနှုန်း သိသိသာသာမြင့်တက်ခဲ့ပြီး ဟန်းဆက် ရောင်းအားသည်လည်း ကျဆင်းနေသည်ဟု မိုဘိုင်းဟန်းဆက် အရောင်းဆိုင်ပိုင်ရှင်များက ပြောသည်။ ''ငွေဈေးတက်လို့ တစ်ဖက်မှာ သွင်းလာတဲ့ ပစ္စည်းကို စားသုံးသူဆီကို ပြန်ရောင်းတဲ့အခါ ကုန်ပစ္စည်းတွေ ဈေးတက်တာပေါ့။ စားသုံးသူဆီမှာ သွားထိတာပေါ့။ သွင်းကုန်လုပ်ငန်းရှင်တွေအတွက်က ဒေါ်လာဈေး အတက်အကျတွေ ဖြစ်နေတာထက် တည်ငြိမ်နေ ရင်  တော့ ပိုကောင်းတာပေါ့။ သွင်းကုန်တွေ ဈေးတက်တာနဲ့ ပြည်သူတွေ ကို သွားထိတာပဲ''ဟု ပို့ကုန်၊ သွင်းကုန်လုပ်ငန်းရှင် ဦးနှင်းဦးက ပြောသည်။


သွင်းကုန်လုပ်ငန်းရှင်အများစုသည် နိုင်ငံခြားငွေလဲလှယ်နှုန်း တက်သည်နှင့် ယခင်ကတည်းက တင်သွင်းထားသော ကုန်များကိုပါ  ဈေးမြှင့်တင်ခြင်းရှိနေသည်ဟု ဝေဖန်မှုများလည်းရှိသည်။ သို့ရာတွင် သွင်းကုန် လုပ်ငန်းများအတွက်လည်း ငွေကြေးဈေးနှုန်း တည်ငြိမ်ရေး ကိုသာ အလိုရှိကြောင်း PRO 1 MYANMAR Co., Ltd မှ အုပ် ချုပ်မှုဒါရိုက်တာ ဦးမျိုးထွေးက ''ဒေါ်လာဈေး မြင့်လာတာနဲ့အမျှ သွင်းကုန်ရဲ့ အရင်းတန် ဖိုး မြင့်တက်လာတယ်။ အရင်းတန်ဖိုးမြင့် လာတော့ သွင်းလာတဲ့အချိန်မှာ အချိန်တစ်ခုအထိတော့ ဈေးနှုန်း မတင်ဘဲနဲ့ ရောင်းနိုင်ပေမယ့် ဈေးနှုန်းတက်တဲ့ကာလက တော် တော်လေး ကြာလာတဲ့အခါကြတော့ နောက် တစ်ပတ် နောက်တစ်ပတ် ပြန်လည်တဲ့အခါမျိုးမှာ ဈေးနှုန်းတင်ရောင်းလာရတယ်။ အဓိက ကတော့ ဈေးနှုန်းကို တည်ငြိမ်စေချင်တယ်''ဟု ပြောပြသည်။ ပြည်ပမှသွင်းသည့် စားသောက်ကုန်နှင့် အခြားကုန်ဈေးနှုန်း များ တက်ခြင်းကြောင့် ပြည်သူလူထုကို ထိခိုက်စေသလို အစိုးရ Project များတွင်လည်း သွင်းကုန်စရိတ် ဈေးကြီးသွားသည့်အတွက် မူလမှန်းသည်ထက် ဘတ်ဂျက်၌ လိုငွေ ပိုမိုများပြားလာနိုင်မည် ဖြစ်သည်။


ဒေါ်လာဈေးသည် သွင်းကုန်ပိုင်း၌ လူသုံးကုန်သာမက ထုတ်ကုန်လုပ်ငန်းအတွက်လည်း ကုန်ကြမ်းတင်သွင်းပြီး ပြည်တွင်းတွင် ထုတ်လုပ်ပါက အဆိုပါပစ္စည်းများပါ ဈေးတက်လာသဖြင့် ထုတ်ကုန်လုပ်ငန်းရှင်များ အတွက်ပါ စိန်ခေါ်မှုတစ်ရပ်ဖြစ်ကြောင်း စီးပွားရေး ပညာရှင် ဒေါက်တာအောင်ကိုကိုက ရှင်းပြသည်။ ပို့ကုန်လုပ်ငန်းရှင်များကလည်း ဒေါ်လာဈေး ဆက်တိုက်မြင့် တက်လာခြင်းကြောင့် သွင်းကုန်လုပ်ငန်းအများစု ရပ်ဆိုင်းထားရ သည်ဟု ဆိုသည်။ အမှန်ဆိုလျှင် ဒေါ်လာတန်ဖိုးမြင့်နေချိန်တွင် ပို့ကုန်အခွင့်အလမ်းကို မိမိရရ ဆုပ်ကိုင်နိုင်ရန် အလွန်လိုအပ်သည်။သို့သော် ပို့ကုန်ကဏ္ဍတွင် ရေထွက်ကုန်တင်ပို့မှု တစ်ခုတည်း ကိုကြည့် လျှင်ပင် အိမ်နီးချင်းနိုင်ငံများ၌ ရေထွက်ကုန်များအား သန်း ၇ဝဝဝ၊ သန်း ၉ဝဝဝ ခန့် ထုတ်နေချိန်တွင် မြန်မာနိုင်ငံအတွက် သန်း ၅ဝဝ ခန့်ကိုပင် ထိထိမိမိ ထုတ်နေရသည်ကို တွေ့ရသည်။


ကုန်သည်စက်မှုအသင်းချုပ် ဒုတိယဥက္ကဋ္ဌ ဒေါက်တာမောင် မောင်လေးက ''ဒီအခွင့်အရေးကို ပို့ကုန်သမားတွေက အကုန်မယူ နိုင်တဲ့အတွက် အလွန်ဝမ်းနည်းစရာကောင်းပါတယ်။ Expoter တချို့က ကြိုက်ပေမယ် လို့ သူတို့ရတဲ့အခွင့်အရေးကို မိမိရရယူနိုင်တဲ့ အင်အားမရှိဘူး။ အင်နဲ့အားနဲ့ ပို့နိုင်တာတွေမရှိတဲ့အတွက် မကောင်း တဲ့ဘက်က ပိုများတာပေါ့။ ဆိုတော့ ကုန်ဈေးနှုန်းတက်တော့ အားလုံးအတွက် ထိခိုက်တယ်။ ဒါတွေ က နိုင်ငံရေးနဲ့လည်း ဆက်စပ် နိုင်တော့ အစစအရာရာ မကောင်းတဲ့ဘက်ကို ဖြစ်နိုင်တာပေါ့''ဟု သုံးသပ်ပြောဆိုသည်။ အစိုးရသစ်လက်ထက် ပထမခုနှစ်လခွဲတာ ကာလအတွင်း ပြည်တွင်း၌ ကုန်ထုတ်လုပ်မှု အား နည်းသောကြောင့် ပို့ကုန်ပမာဏထက် သွင်းကုန်ပမာဏက ပိုမိုများပြားနေသဖြင့် ကုန်သွယ်မှုလိုငွေ အမေရိကန်ဒေါ်လာ နှစ်ဘီလီယံကျော် ရှိနေသည်။ ဒေါ်လာဈေးတက်ခြင်းကို ထိန်းနိုင်ရန်အတွက် သွင်းကုန် ကို လျော့ကျစေရန် ဆောင်ရွက်ရမည်ဖြစ်သည်။ ထိုသို့လုပ်ဆောင်ခြင်း ၏ အခြားတစ်ဖက်တွင်လည်း ပြည်တွင်းရှိ အချို့တည်ဆောက်ရေး လုပ်ငန်းများအတွက် ကျပ်တည်းသွားနိုင်ကာ၊ စားသုံးကုန်များတွင်လည်း အချို့ ပစ္စည်းများသည် မရှိမဖြစ် လိုအပ်သည့်အရာများ ဖြစ် နေပြန်သည်။


ဥပမာအားဖြင့် ဆေးဝါးပစ္စည်းများမှာ  ပြည်ပမှရာခိုင်နှုန်း ၉ဝ တင်သွင်းနေရခြင်းဖြစ်ပြီး၊ ဈေးနှုန်းမြင့်တက်သွားစေကာမူ မရှိမဖြစ် လိုအပ်ပစ္စည်းဖြစ်သောကြောင့် တင်သွင်းမှုလျှော့ချရန် မဖြစ် နိုင်သေးပေ။ အားရကျေ နပ်ဖွယ် မကောင်းသေးသော ပို့ကုန်တင်ပို့မှု အနေအထားနှင့် သွင်းအားစု များနေခြင်းကြောင့် ကုန်ဈေးနှုန်းများမှာ တက်ရိပ်ကိုသာ ဦးတည်လျက်ရှိနေသည်။ ယင်းသို့ ကုန်ဈေးနှုန်းများ တက်လျှင် ပြည်သူများအတွက် စားဝတ်နေရေး လုံလောက်မှုရှိနိုင် မည်မဟုတ်ဘဲ ဆူပူအုံကြွကာ နိုင်ငံရေးများ မတည်မငြိမ်ဖြစ်တတ်သည်။ (၂ဝဝ၇ ခုနှစ်အတွင်းက ကုန်ဈေးနှုန်းတက်သည်ကို ဆန္ဒပြပွဲများ ပြုလုပ်ခဲ့၍ နိုင်ငံရေး မငြိမ်မသက်မှု များ ဖြစ်ပေါ်ခဲ့သည်။) ဒေါ်လာဈေးနှင့် ကုန်ဈေးနှုန်းတက်မှုသည် မည်သည့်ဘက် တွင်မှ ကောင်းသောအနေအထား မရှိပေ။ ဒေါ်လာကြောင့် ပြည်သူအများစု ဆင်းရဲတွင်း နက်နိုင်သဖြင့် အစိုးရမှ အဆောတလျင် ဖြေ ရှင်းပေးရန် လိုအပ်သည်ဟု ဝေဖန်မှု များ ရှိနေသော်လည်း၊ နိုင်ငံခြားငွေလဲလှယ်နှုန်းကို အစိုးရမှ တိုက်ရိုက် ထိန်းချုပ်၍ မရနိုင်ကြောင်း စီမံကိန်းနှင့် ဘဏ္ဍာရေး ဒုတိယဝန်ကြီး ဦးမောင်မောင်ဝင်းက ပြည်ထောင်စု လွှတ်တော်တွင် ပြောကြားထား သည်။


''ဆေးဝါးတွေ၊ လူသုံးကုန်တွေ နိုင်ငံခြားကသွင်းရတယ်။ ဒေါ်လာ ဈေးတက်ရင် အဲဒါတွေပါ တက်မယ်။ လောင်စာဆီဈေးပါ တက်မယ်ဗျာ။ ပြည်တွင်းမှာထုတ်တဲ့ ဆန်တို့၊ ပဲတို့၊ အသီးအရွက်တွေက သယ်ယူ ပို့ဆောင် ခကြောင့် ဈေးလိုက်တက်မှာပဲ။ အဲဒါတွေကိုတော့ အစိုးရက ဝင်ပြီးတော့ အဆင်ပြေအောင် ဆောင်ရွက်ပေးလို့ရတယ်။ ရပ်ကြည်နေလို့ မရဘူး။ သူ့သဘော သူဆောင်ပြီး တက်တာဆိုပြီး ထိုင်ကြည့်နေရင်တော့ တစ်နိုင်ငံလုံး စီးပွားပျက်သွားနိုင်တယ်''ဟု ဘဏ်အကြံပေး ဦးရဲမင်းဦးက ပြောသည်။ အစိုးရမှ ဒေါ်လာဈေးတက်ခြင်းအား  ထိန်းချုပ်မရသည်ကို လက်ခံနိုင်သည် ဆိုသော်လည်း၊ ယင်းအကျိုးဆက်ကြောင့် တိုင်း ပြည် မထိခိုက်စေရန် လုပ်ဆောင်ရမည်ကို သတိချပ်သင့်သည်ဟု ငွေကြေးပညာရှင်များက သုံးသပ်သည်။ ''ငွေကြေးသမိုင်းကိုကြည့်ရင် ဒီမိုကရေစီဘိုးအေ နိုင်ငံကြီးတွေ တောင် အဲလို မရှုမလှဖြစ်ပြီဆိုရင် ဥပဒေတွေ၊ ဘာတွေ ထုတ်ပြီး တော့ ကာကွယ်တားမြစ်နိုင်တယ်။ အစိုးရက သာမန်အားဖြင့် ပါဝင်ပတ်သက်မှု မလုပ်ရဘူး။ ဈေးကွက်စီးပွားရေးစနစ်ကို ဒီမိုကရေစီ နိုင်ငံတွေ၊ အရင်းရှင်နိုင်ငံတွေမှာ သာမန်အားဖြင့် ဝင်ရောက် ပါဝင် မပတ်သက်ရဘူး။ သာမန်မဟုတ်ရင်တော့ ဝင်ရောက်ထိန်းကျောင်း ပြီးတော့ ဥပဒေတွေထုတ်ပြီး ထိန်းသိမ်းကာကွယ်လိုက်တာတွေ အများ ကြီး ရှိပါတယ်''ဟု ဦးလှမောင်က ဆိုသည်။


စီးပွားရေးပညာရှင်အချို့က ဒေါ်လာဈေး ကျပ် ၁,၃ဝဝ ကျော် လျှင် နိုင်ငံ့စီးပွားရေး အခြေအနေမကောင်းဟု သုံးသပ်ခဲ့ဖူးကြသည်။ ယခုအခါတွင် ၁၄ဝဝ ကျော်သို့ပင် ရောက်ရှိခဲ့ပြီး ပြန်လည်ကျဆင်းသည့် ၁၃၈ဝ ဆို သည့် ပမာဏမှာ ကြောက်မက်ဖွယ်ရာအနေအထားတွင်ပင် ရှိနေသည်။ မည်သို့ပင်ဆိုစေ ပြည်သူအများစုက ၎င်းတို့ ရွေးချယ်တင် မြှောက်ထားသော အရပ်သားစစ်စစ်အစိုးရက ကျပ်ငွေတန်ဖိုး ပြန်မာလာအောင် လုပ်ပြီး ကုန်ဈေးနှုန်းများကျဆင်းလာအောင် ပြန်လည် စွမ်းဆောင်နိုင်လိမ့်မည်ဟု ယုံကြည်မျှော်လင့်နေကြဆဲ ဖြစ်သည်။ သို့မဟုတ်ပါဘဲ လက်ရှိအနေအထားအတိုင်းသာ ဆက်လက် တည်ရှိနေမည်ဆိုပါက ဒေါ်လာ သည် မြန်မာ့စီးပွားရေးကို လက် တွေ့ကျကျ အခက်အခဲများပေးနေမည် ဖြစ်သလို ပြည်သူလူထုအတွက်လည်း စီးပွားရေးကျပ်တည်းမှုကို ဖန်တီးနိုင်သည်ဖြစ်တဲ့ ဒေါ်လာသည် ကြောက်မက်ဖွယ်ရာ တစ္ဆေတစ်ကောင် ကဲ့သို့ပင် ခြောက်လှန့် နေလိမ့်အုံးမည် ဖြစ်သည်။     

ဖြူသစ်လွင်

#theyangontimes

 

 

           

Rate this item
(0 votes)
M ဘွယ်

M-Bwel (Online Editor)

Login to post comments
back to top
adv

adv

FacebookG+TwitterRSS