Main menu
HOT NEWS
adv
ပါတီ ကိုယ်စားပြုခြင်းမှ  ပြည်သူ  ကိုယ်စားပြုခြင်းသို့

ပါတီ ကိုယ်စားပြုခြင်းမှ ပြည်သူ ကိုယ်စားပြုခြင်းသို့

ဒီမိုကရေစီစနစ်ရဲ့ မရှိမဖြစ် လိုအပ် တဲ့ ပါတီစုံဒီမိုကရေစီ ရွေးကောက် ပွဲများကနေ ရွေးချယ်ပေးလိုက်တဲ့လွှတ်တော်ကိုယ်စားလှယ်တွေ အကြောင်း မှတ်သားမိသလောက် တင်ပြချင်ပါတယ်။

လွှတ်တော်ကိုယ်စားလှယ်ဆို တာ တစ်သီးပုဂ္ဂလအဖြစ် ရွေးချယ်ခံရတဲ့ သူကလွဲရင် မိမိတို့ကိုယ်စားပြုတဲ့ နိုင်ငံ ရေးပါတီအပေါ် သစ္စာခံကြရစမြဲ။ ပါတီရဲ့ မူဝါဒနဲ့သဘောထားများအပေါ် အကောင် အထည်ဖော်ပေးရစမြဲ ဖြစ်ပါတယ်။ ဒါ ပေမဲ့ ပါတီကိုယ်စားပြု အရွေးချယ်ခံရသူ ပဲဖြစ်ဖြစ် တစ်သီးပုဂ္ဂလကိုယ်စားလှယ်ပဲ ဖြစ်ဖြစ် တူညီတဲ့ ဘုံရပ်တည်ချက်ကတော့ ပြည်သူလူထုအကျိုးနဲ့ နိုင်ငံတော်အကျိုး အတွက် စွမ်းစွမ်းတမံ အကျိုးပြုရမယ်ဆိုတဲ့ သဘောထားရှိပါတယ်။ ဒါဟာ တစ် နည်းပြောရရင် မဟာဗျူဟာ ခံယူချက် ဖြစ်ပါတယ်။ ဒါပေမဲ့ မဟာဗျူဟာနဲ့ နည်း ဗျူဟာ သို့မဟုတ် သေနင်္ဂဗျူဟာနဲ့ နည်း ပရိယာယ် သို့မဟုတ် သီအိုရီနဲ့ လက်တွေ့ အကောင်အထည်ဖော်မှုများအကြားမှာ မထင်မှတ်တဲ့ကွာဟချက်တွေ တွေ့ရတတ် ပါတယ်။ မဟာဗျူဟာဆိုတာ လိုအပ်ချက် ဖြစ်ပြီး နည်းဗျူဟာကတော့ ရွေးချယ်မှု ဖြစ်ပါတယ်။ လိုအပ်ချက်အတွက် ရွေး ချယ်မှုမှန်ဖို့ အရေးကြီးပါတယ်။ သို့သော် လည်း တစ်ခါတစ်ရံမှာ ရွေးချယ်မှု မှန် ပေမယ့် အခြေအနေမပေးပြန်ရင်လည်း အဲဒီရွေးချယ်မှုဟာ အဟောသိကံ ဖြစ်ရ တတ်ပါတယ်။

မြန်မာနိုင်ငံလို ဖွံ့ဖြိုးစနိုင်ငံ သို့မဟုတ် ဖွံ့ဖြိုးမှုအနည်းဆုံးဆိုတဲ့ 'တွင်း နက်ကြီး' ထဲက ရုန်းမထွက်နိုင်သေးတဲ့ နိုင်ငံ၊ ပြည်တွင်း လက်နက်ကိုင်ပဋိပက္ခ အရှည်ကြာဆုံး နေ့ရက်ထဲမှာ စီးမျောနေ တဲ့နိုင်ငံ၊ တိုင်းရင်းသားမျိုးနွယ်စုတွေက လည်း ၁၃၅ မျိုးရှိပြီး မိမိရဲ့ ဇာတိပုည ဂုဏ်မာနတွေအပေါ်မှာ အမျိုးသားဆိုင် ရာ အမှတ်သရုပ်တွေ ကိုယ်စီရှိကြတဲ့ နိုင်ငံ၊ ၁၉၄၇ ခုနှစ် ဗြိတိသျှ ကိုလိုနီလက် အောက်က အချုပ်အခြာအာဏာပိုင် နိုင်ငံအဖြစ် တိုက်ပွဲဝင်စဉ်ကတည်းက စွဲ မြဲလာခဲ့တဲ့ ကိုယ်ပိုင်အုပ်ချုပ်ခွင့်နဲ့ ဖက် ဒရယ်စနစ် ခွဲထွက်ခွင့်ဝေဒနာတွေနဲ့ ရောဂါ သည်းလာခဲ့တဲ့ နိုင်ငံမှာ လွှတ်တော်ကိုယ် စားလှယ် ဖြစ်လာကြသူတွေအဖို့ တာဝန် ကြီးလွန်းလှပါတယ်။

အခြားတစ်ဖက်မှာလည်း စစ်အာဏာရဲ့လောင်းရိပ်က ရုန်းမထွက်နိုင် သေးတဲ့ ၂ဝဝ၈ ဖွဲ့စည်းပုံအခြေခံက လည်းြေ>ွမပူရာကင်းမှောင့်ဆိုသလို တစ် ထောင့်တစ်နေရာက ဝန်ထုပ်ဝန်ပိုး ဖြစ် နေစေပါတယ်။ ၂ဝဝ၈ ဖွဲ့စည်းပုံအခြေခံ ဥပဒေဟာ တရားဥပဒေစိုးမိုးရေး၊ ပြည် တွင်းငြိမ်းချမ်းရေးနဲ့ ဒီမိုကရေစီရေး ပြဿ နာများအပေါ်မှာ ရှုပ်ထွေးအောင် ဖန်တီး နေပါတယ်။

လယ်ယာမြေ ပြဿနာ၊ အလုပ်လက်မဲ့နဲ့ လုပ်ငန်းခွင် အဆင်မပြေမှုများ၊ အကျင့်ပျက်ခြစားမှုနဲ့ လာဘ်ပေးလာဘ်ယူ ပြဿနာ၊ စီးပွားရေး ကျဆင်းမှုနဲ့ ငွေကြေးမတည်ငြိမ်မှု ပြဿနာစတဲ့ ပြဿနာပေါင်း သောင်းခြောက်ထောင်ကလည်း ဂျာအေးသူ့အမေရိုက် ဆိုသလို လုံးချာလိုက်နေတဲ့ မြေပြင်အနေအထား တွေနဲ့လည်း နဖူးတွ့ဒူးတွေ့ တွေ့နေရ ဆဲဖြစ်ပါတယ်။ တစ်ခါတစ်ရံ ဘာသာ ရေး ပယောဂတွေပါတဲ့ လူမျိုးရေး သို့မဟုတ် လူမျိုးရေးပယောဂတွေ ပူးဝင်နေတဲ့ ဘာသာရေး ထိပ်တိုက်ရင်ဆိုင်မှု တွေကလည်း အရှိန်အဟုန် မြင့်တက် လာတတ်ပါသေးတယ်။ မူးယစ်ဆေး ဝါးနဲ့ လူကုန်ကူးမှု ပြဿနာတွေ ခေါ်ဆို လေ့ရှိတဲူ့ငာငအနွျှိမေ  ဆိုတာမျိုးတွေ ကလည်း တစ်ခါတစ်ရံ ကောက်ရိုးမီးလို ဟုန်းကနဲ့ ထလာတတ်ပါသေးတယ်။

ဒီလို ထိပ်တိုက်ရင်ဆိုင်မှုတွေ၊ ပဋိပက္ခတွေ၊ ပေါက်ကွဲမှုတွေက နိုင်ငံ ရေး၊ စီးပွားရေး၊ လူမှုရေးနဲ့ အခြားဘက် ပေါင်းစုံက ဝိုင်းပတ်မာန်ဖီနေတဲ့ နိုင်ငံ မှာ လွှတ်တော်ကိုယ်စားလှယ် တစ် ယောက်ရဲ့ အခန်းကဏ္ဍဟာလည်း ဘယ် လောက် သိမ်မွေ့ခက်ခဲလိုက်သလဲဆို တာ စဉ်းစားကြည့်ရင် သိနိုင်ပါတယ်။

လွှတ်တော်ဆိုတာ တကယ်ကတော့ ဒီမိုကရေစီရဲ့ သင်္ကေတ၊ လွှတ် တော်ကိုယ်စားလှယ်ဆိုတာ ပြည်သူလူထုရဲ့ ကိုယ်စားပြုပုံရိပ် ''လွှတ်တော်ထဲမှာ အခါအားလျော်စွာ ကျင်းပခဲ့တဲ့ ရွေး ကောက်ပွဲများမှ ပြည်သူလူထုရဲ့ လွတ်လပ်တဲ့ဆန္ဒနဲ့ ရွေးကောက်တင်မြှောက်ခံ ထားရသူ ပြည်သူ့ကိုယ်စား လှယ်တွေကို အခြေခံထားတာ ဖြစ်ပါတယ်။

ဥပဒေတွေ ရေးဆွဲရမယ်။ ပြဋ္ဌာန်းထားတဲ့ ဥပဒေတွေကို လိုက်နာ ကျင့်သုံးပြီး နိုင်ငံတော်ဖွံ့ဖြိုးတိုးတက် အောင်၊ ပြည်သူလူထုရဲ့ စားဝတ်နေရေး နဲ့ နောက်ကျောလုံစွာ အသက်မွေးဝမ်း ကျောင်း ရှာဖွေနိုင်အောင် ဆောင်ရွက် ကြရပါတယ်။ ဥပဒေတွေ၊ မူဝါဒတွေ၊ ညွှန်ကြားလွှာတွေ ချမှတ်တာ ကိုယ်စား လှယ်တွေ စုပေါင်းသုံးသပ် ဆုံးဖြတ်ထား တာတွေကို တရားဝင်ဖြစ်အောင် ကြိုး ပမ်းရကာ အစိုးရနဲ့အာဏာပိုင် အဖွဲ့အ စည်းတွေကို တာဝန်ခံရတာ၊ ပြည်သူ့ ဆန္ဒ လွှတ်တော်ဆန္ဒ၊ ပြည်သူ့အသံ လွှတ် တော်အသံ စသည်ဖြင့် ဆွေးနွေးတိုင်ပင်၊ တုံ့ပြန်ပေးရတာ ဒီမိုကရေစီစနစ်ကို လိုက်နာကျင့်သုံးပြီး အစိုးရအဖွဲ့ကို လည်း ဒီမိုကရေစီနည်းကျ အုပ်ချုပ်စေ တာဟာ လွှတ်တော်ရဲ့ လုပ်ငန်းတွေ ဖြစ် ပါတယ်။ လွှတ်တော်တစ်ရပ်ဟာ ပြည် သူလူထုအတွက် အကျိုးပြုသလား၊ မပြု ဘူးလား၊ ပြည်သူလူထုအပေါ် လွှတ် တော်ရဲ့ ပုံရိပ်ကောင်းတွေ သက်ရောက် မှုရှိသလား မရှိဘူးလားဆိုတာ ပြည်သူ လူထုရဲ့ လက်တွေ့ဖြစ်ပေါ် တိုးတက်မှု များနဲ့သာ တိုင်းရမှာဖြစ်ပါတယ်။ နိုင်ငံ ရေးအရ တိုင်းရမယ့်ပေတံကတော့ ဒီမို ကရေစီ တန်ဖိုးတွေနဲ့ တိုင်းရမှာပါ။ လွှတ် တော်တိုင်းမှာ ဒီမိုကရေစီနည်းကျ လုပ် ထုံးလုပ်နည်းတွေ၊ အကဲဖြတ်မှုတွေ အစီ အစဉ်တကျရှိပြီး ဖြစ်ပါတယ်။    

မဏ္ဍိုင်ကြီးသုံးရပ်ဖြစ်တဲ့ တ ရားဥပဒေပြုခြင်း၊ တရားစီရင်ခြင်းနဲ့ စီ မံအုပ်ချုပ်ခြင်းတွေကို လွှတ်တော်က ဘယ်နှုန်း စံတန်ဖိုးတွေနဲ့ ဖန်တီးသလဲ။ အကဲဖြတ်သလဲ။ လက်တွေ့ကျကျ ပူး ပေါင်းပါဝင် ပံ့ပိုးသလဲ။ ဝေဖန်အကြံပြု သလဲ။ လွတ်လပ်မှုနဲ့ တန်းတူညီမျှမှု ရှိစေ သလဲ။
ထပ်မံပြီးပြောရရင် ဥပဒေပြု ခြင်းနဲ့ ဥပဒေပြုသူများအကြား ကွာဟ ချက်တွေ၊ အားနည်းချက်တွေကိုလည်း စနစ်တကျ လေ့လာအကဲဖြတ်ဖို့ လိုပါ လိမ့်မယ်။ ဥပဒေပြုမှုဟာ ဥပဒေကို ချိုး ဖောက်သူမ ဖြစ်စေရဆိုတဲ့ ''တော်ဝင် မိန့်ဆိုချက်''ကို အထူးလေးနက်ရပါ လိမ့်မယ်။    

ဒီနေရာမှာ လွှတ်တော်ကိုယ် စားလှယ်တို့ရဲ့ အခန်းကဏ္ဍကို ဆွေးနွေး လိုပါလိမ့်မယ်။ လွှတ်တော်ကိုယ်စား လှယ်နဲ့ နိုင်ငံရေးသမားကို အချို့က ခွဲ ခြားရှုမြင်တတ်ကြပါတယ်။ လွှတ်တော် ကိုယ်စားလှယ်တိုင်း နိုင်ငံရေးသမား ဖြစ်ကြပါသလား။ သို့မဟုတ် နိုင်ငံရေး သမားတိုင်းဟာလည်း လွှတ်တော်ကိုယ် စားလှယ်အဖြစ် တာဝန်ယူကြပါသလား။ ယနေ့ မြန်မာ့နိုင်ငံရေး အခြေအနေအ ရဆိုရရင် လွှတ်တော်ကိုယ်စားလှယ် တိုင်းဟာ နိုင်ငံရေးသမား မဟုတ်ကြပါ။ ထို့အတူ နိုင်ငံရေးသမားတိုင်းကလည်း လွှတ်တော်ကိုယ်စားလှယ်ဘဝကို မခုံမင် တတ်ကြပါ။    

ထပ်မံဆိုရရင် နိုင်ငံရေးသ မားဟာ ကိုယ့်ကိုယ်ကိုယ်လည်း မရိုသေ၊ မယုံကြည်၊ အများအကျိုး ပြည်သူ့အကျိုး ကိုလည်း သယ်ပိုးရကောင်းမှန်း မသိရင် သို့မဟုတ် ကိုယ့်ကိုယ်ကိုယ်သာ အထင် ကြီး၊ ဘဝင်မြင့်နေရင် ပြည်သူ့အကျိုးကို မစွမ်းဆောင်နိုင်ရုံမျှမက ပြည်သူလူထု ရဲ့ ဒဏ်ခတ်ခြင်းကိုပင် ခံရတတ်ပါတယ်။ ငါသာမှန်တယ်။ ငါလုပ်တာ အားလုံး လက်ခံရမယ်ဆိုတဲ့ အတ္တသဘောထား ကို လက်ကိုင်ထားကျင့်သုံးတဲ့ နိုင်ငံရေး သမားအဖို့ ဒီမိုကရေစီနိုင်ငံရေးအပေါ် ဘယ်သောအခါမှ အဓိပ္ပာယ်ဖွင့်ဆိုလို့ ရမှာ မဟုတ်ပါဘူး။ နိုင်ငံရေးသမား ကောင်းဟာ ပြဿနာတစ်ရပ်အပေါ်မှာ မိမိတို့ရဲ့ နိုင်ငံရေးဖြတ်သန်းမှု အတွေ့ အကြုံ ယထာဘူတနဲ့ အနုမာနဆိုတဲ့ ဘက်နှစ်ဖက်၊ ထောင့်နှစ်ထောင့်အမြင်နဲ့ ချဉ်းကပ် အဖြေထုတ်တတ်သူ ဖြစ်ရပါ မယ်။ သူဟာ အပျော်တမ်းသမားမဟုတ် ဘူး။ လက်တွေကျတဲ့ စိတ်ကူးစိတ်သန်း တွေနဲ့ လေးလေးနက်နက် စဉ်းစားတတ် သူဖြစ်ပါတယ်။

 ပြည်သူလူထု ကိုယ်စားပြုတဲ့ ပြည်သူလူထုအတွက် သစ္စာနှံထားတဲ့ လွှတ်တော်ကိုယ်စားလှယ် ဆိုတာက လည်း လက်ညှိုးထောင် ခေါင်းညိတ်မ လုပ်၊ ပြဿနာအပေါ်မှာ သဘာဝယုတ္တိ၊ အာဂမယုတ္တိတွေနဲ့ ခွဲခြားစိတ်ဖြာတတ် သူမျိုးမှ တကယ့်ပြည်သူကိုယ်စားလှယ် ဖြစ်ပါတယ်။

ဒီနေရာမှာ လွှတ်တော်ကိုယ် စားလှယ်တစ်ယောက်အတွက် စိန်ခေါ် မှုနဲ့ ဖိအားအချို့ကို ကြုံတွေ့ရတတ်ပါ တယ်။ အဲဒါကတော့ ပါတီကိုယ်စားပြုပြီး ကိုယ်စားလှယ် ဖြစ်လာသူများက တစ်ခါ တစ်ရံ ပြည်သူလူထုရဲ့ အကျိုးစီးပွား၊ သို့ မဟုတ် နိုင်ငံတော်ရဲ့ အကျိုးစီးပွား၊ သို့ မဟုတ် အမျိုးသားအကျိုးစီးပွားဆိုတဲ့ ရွေးချယ်မှုအချို့နဲ့ ကြုံတွေ့ရတတ်ပါ တယ်။ နိုင်ငံရေးအရ မိမိအကျိုးနဲ့ ပါတီ အကျိုးယှဉ်လာရင် မိမိအကျိုးထက် ပါ တီအကျိုးကို ကြည့်ရမယ်။ ပါတီအကျိုး နဲ့ ပြည်သူအကျိုး၊ နိုင်ငံအကျိုးယှဉ် လာရင်လည်း ပါတီအကျိုးထက် နိုင်ငံ အကျိုး ပြည်သူ့အကျိုးကိုပဲ ကြည့်ရမယ်။ ဒါဟာ ဆိုရိုးစကားပါ။

ဒါပေမဲ့ တစ်ခါတစ်ရံမှာတော့ နိုင်ငံရေး ဖြစ်ပေါ်တိုးတက်မှုဟာ ရိုးစင်းလှတာမဟုတ်ပါဘူး။ အမျိုးသားရေး ပြ ဿနာတွေ၊ မျိုးချစ်စိတ်ဓာတ်နဲ့ ဆိုင်တဲ့ ဖိအားတွေ၊ ဘာသာရေးနဲ့ ဆက်နွယ်တဲ့ စိန်ခေါ်မှုတွေအပြင် အခြားမထင်မှတ် ထားတဲ့ ပြဿနာတွေကိုလည်း ကြုံတွေ့ ရတတ်ပါတယ်။ ဒီအခါမှာတော့ လွှတ် တော်ကိုယ်စားလှယ်ရဲ့ ဆင်ခြင်တုံတရား နဲ့ဆုံးဖြတ်ချက်ဟာ အလွန်ထိလွယ်ရှ လွယ်ဖြစ်လာရပါတယ်။ တစ်ခါတစ်ရံ မှာ မိမိကိုယ်စားပြုခဲ့တဲ့ ပါတီရဲ့သဘောထားနဲ့ အမြင်က တစ်မျိုး၊ မိမိကိုယ်တိုင် ခံစားနေရတာ ဘက်လိုက်ဆုံးဖြတ်ချင် တာကတစ်မျိုးနဲ့ ဝိရောဓိတွေ ဖြစ်တတ် ပါတယ်။ လွှတ်တော်ကိုယ်စားလှယ်ဟာ သတ္တိရှိရှိ ဆုံးဖြတ်ရပါတော့တယ်။ ဒီအယူအဆ အကျပ်အတည်းကို ဘယ်လို ဖောက်ထွက်ရမလဲဆိုတာ ရဲရဲဆုံးဖြတ် ရပါတော့မယ်။ ရဲစွမ်းသတ္တိ သို့မဟုတ် ဆုံးဖြတ်ရဲတဲ့ ဆန္ဒမဲအရေအတွက်ကို တိုင်းတာတဲ့ ပေတံမဟုတ်သလို ကိုယ်စား ပြုပါတီအတွက်လည်း ဟုတ်ချင်မှဟုတ် ပါလိမ့်မယ်။

''သတ္တိကို မလိမ့်တပတ် လုပ် လို့မရသလို နောက်ပြန်ဆွဲလို့လည်း မရ ဘူးဆိုတာ သမိုင်းဆရာတိုင်းသိပါတယ်။ ဥပဒေ စည်းကမ်းနဲ့ အများကြိုက် ပြိုင် ဆိုင်ကြတဲ့အချိန်မှာ ဟိုးပဝေသဏီ က တည်းက မိမိယုံကြည်မှုအတွက် စွန့် လွှတ်စွန့်စားဝံ့သူတွေဟာ နောင်လာ နောင်သားတွေရဲ့ လေးစားကြည်ညိုမှု ကို ခံစားရတတ်ပါတယ်''လို့ အမေရိ ကန်သမ္မတ Gerald R. Ford က မှတ် ချက်ချခဲ့ပါတယ်။      

Flower News Journal    

Rate this item
(0 votes)
Login to post comments
back to top
adv

adv

Business Info

The Official Website of Yangon Times Journal and Flower News Journal, Publish by Yangon Media Group Limited.

Mission

The Free Press is a Cornerstone of Democracy.
A Free Press, At its Best, Reveals Truth.

Facebook G+ Twitter RSS

Find Us

တိုက် (ဘီ) အမှတ် (၁၀၁) ၊ မဟာ ဗန္ဓုလတာဝါ ၊ ဗန္ဓုလတံတား အနီး ၊ ပုဇွန်တောင်မြို့နယ် ၊ ရန်ကုန်မြို့  ။

Call: 01 9010073 , 01 9010074 , 01 9010075
IT: 09 540 3616