HIGHLIGHT NEWS
Main menu

Article [-- ဆောင်းပါများ ကဏ္ဍ --]

ရှေ့ ဖြစ်ဟောခြင်း

ရှေ့  ဖြစ်ဟောခြင်း

<<<< ရွှေကူမေနှင်း >>>>

 ရှေ့  ဘာဖြစ်မည်ဟု ကြိုတင်ဟောကိန်း ထုတ်သူများကို Fortune Teller ဟု အင်္ဂလိပ်အခေါ်အဝေါ်ရှိပါသည်။ တစ်နည်းအားဖြင့် ဗေဒင်ဆရာဟု ခေါ်ကြသည်။ ကမ္ဘာ ပေါ်ရှိ လူမျိုးအတော်များများတွင် ဤကဲ့သို့ ရှေ့ဖြစ်ဟောပြောမှုကို ယုံကြည်မှုများ ရှိခဲ့ဟန်တူပါသည်။ မြန်မာလူမျိုးတို့လည်း ရှေးနှစ် ပေါင်းများစွာကပင် ဤယုံကြည်မှုမျိုးရှိခဲ့ကြ၏။ မည်သည့်အချိန်တွင် မည်သူကစ၍တီထွင် ခဲ့မှန်း မသိရစေကာမူ ဤအလေ့အထသည် မြတ်စွာဘုရား ဖြစ်တော်မူသောကာလ လွန်ခဲ့သည့်နှစ်ပေါင်း ၂၆ဝဝ ကျော်ကပင်ရှိခဲ့ပြီဖြစ် ကြောင်း ဇာတ်နိပါတ်များအရ တွေ့နိုင်ပါသည်။

မြတ်စွာဘုရားဖြစ်မည့် ကလေးငယ် မွေး မွေးချင်း ဤကလေးသည် ဘုရားစင်စစ် ဧကန် ဖြစ်မည်ဟု ဟောကြားခဲ့သောသာဓကရှိ၏။ ဗာရာဏသီပြည် ဗိမ္မိသာရမင်းကြီး၏ မိဖုရား ဝေဒေဟီ ပဋိသန္ဓေရှိသောအခါ ဘုရင်မင်းကြီး၏ လက်မောင်းသွေးကို သောက်လိုသည်ဟု 'ချဉ်ခြင်း' ဖြစ်ခဲ့ကြောင်း၊ ရှေ့ဖြစ်ဟောဆရာ များက ဤကလေးကား အဘကိုသတ်မည့်သားဟု ဟောခဲ့ကြကြောင်း၊ မင်းကြီးကမူ မိဘမေတ္တာ ဖြင့် သတ်လိုလျှင်သတ်စေ၊ သူ့အလိုပြည့်စေရမည်ဟု မိမိလက်မောင်းသွေးကို ကိုယ်တော်တိုင်ဖောက်၍ တိုက်ခဲ့ကြောင်း၊ ထိုသူငယ် ကြီး ပြင်းလာသောအခါ တကယ်ပင် ဖခင်ကိုသတ်ခဲ့ကြောင်းကိုလည်း ဇာတ်နိပါတ်များ၌ အထင်အရှား ဖော်ပြခဲ့ကြလေသည်။


ဤသို့ဖြင့် ရှေ့ဖြစ်ဟောခြင်း (ဗေဒင်ပညာ)သည် ရှေးကပင်ရှိခဲ့ကြောင်း မှတ်ယူနိုင်ပါသည်။ သို့သော် ထိုသို့ဟောသမျှသည် မှန်ကန်ပါ၏လောဟု စောကြောစရာကားရှိ၏။ မှန်သဖြင့် ယုံသူရှိသလို၊ မမှန်သဖြင့် မယုံသူများလည်းရှိသည်။ အရေးအကြောင်းပေါ်လျှင်မူ ဗေဒင်ပြေးမေးလိုက်မှ စိတ်အေးတတ်သူများ လည်း အများအပြားရှိနေသည်။ အမှန်စင်စစ် ဗေဒင်ပညာသည် မြန်မာနိုင်ငံသို့ ဗုဒ္ဓဘာသာနှင့်အတူ ကပ်လျက်ပါလာ သော ယုံကြည်မှုတစ်ခုပင်ဖြစ်၏။ ဗုဒ္ဓကျမ်းစာများသည် အိန္ဒိယပြည်မှလာသည့်နည်းတူ ဗေဒင်ကျမ်းများသည်လည်း အိန္ဒိယပြည်မှပင် ရောက်ရှိခဲ့ခြင်းဖြစ်၏။ အိန္ဒိယပြည်၌ မူလအစ ကမ္ဘာဦးကျမ်းများအဖြစ် တည်ရှိခဲ့ပြီး နောင်အခါ အရှေ့အလယ်ပိုင်းနိုင်ငံများနှင့် ကူးလူးဆက်ဆံရသောကာလ၌ အီဂျစ် စသော ရှေး ဟောင်းအယူရှိသည့်ကျမ်းများ ရောက်ရှိရော နှောခဲ့သည်။ ကျမ်းဟောင်းနှင့် ကျမ်းသစ်ဟူ၍ ရှိလာသည်။ အခြေခံအချက်ကားတူညီ၏။ အားလုံးသောဗေဒင်ကျမ်းများ၏ ဟောကိန်းသည် နေလကြယ်တာရာနက္ခတ်များနှင့် သက်ဆိုင်နေလေသည်။


ရှေးဗေဒပညာရှင်များ၏ အယူအရ လူတစ်ယောက် မွေးဖွားသောအချိန်၌ ကောင်းကင်တွင် ထွန်းလင်းလျက်ရှိသော ဂြိုဟ်များ၊ နက္ခတ်များ၏ အစွမ်းများက မွေးဖွားလာသူအားလွှမ်းမိုးသည်ဟူ၍ဖြစ်၏။ ထိုအခါ ထိုအချိန်၌ ကောင်းကင်တွင် ကြီးစိုးခဲ့သောနက္ခတ်များကို ရှာဖွေကာထိုလူ၏ မည်သည့်အချိန် မည်သို့ ကြုံရမည်ဟု အဓိပ္ပာယ်ကောက်ယူကြခြင်းဖြစ်သည်။ ကောင်းကင်ရှိ နက္ခတ်တာရာများတွင် ကောင်းသောနက္ခတ်၊ ဆိုးသောနက္ခတ်ဟု ရှိသည်ဟု ယူဆပြီး ထိုအချိန်မွေးသူသည် အဆိုပါ နက္ခတ်များ၏ ဆိုးခြင်း၊ ကောင်းခြင်းကိုခံရသည်ဟု တွက်ချက်ကြခြင်းဖြစ်၏။
ဟောချက်နှင့်ကိုက်ညီခြင်း၊ လွဲချော်ခြင်းများလည်းရှိသည်။ ဤပြဿနာနှင့်ပတ်သက် ၍ အိန္ဒိယနိုင်ငံရှိ နက္ခတ္တဗေဒသင်တက္ကသိုလ်တစ်ခုမှထုတ်သော သင်ရိုးစာစောင်တွင် ရှင်းလင်းထား၏။


လူတစ်ယောက် မွေးဖွားချိန်၌ ကောင်းကင်တွင် မည်သည့်နက္ခတ်များရှိကြောင်း ရှာဖွေရာတွင် ထိုမွေးဖွားချိန် တိကျရန်လိုအပ်သည်။ ကမ္ဘာသည် ၂၄ နာရီ တစ်ပတ် မိမိဝင်ရိုး ပေါ်တွင် လည်နေသဖြင့် အရှေ့နိုင်ငံများနှင့် အနောက်နိုင်ငံများသည် တစ်ပြိုင်နက် အချိန် မတူကြချေ။ ထို့ကြောင့် အိန္ဒိယကျမ်းအရ မွေး ဖွားချိန်တွင် ထွန်းလင်းသောနက္ခတ်များကို တစ်ပြိုင်နက်ယူ၍ မဖြစ်ချေ။ ထိုအခါ မွေးဖွား သောတည်နေရာကို ကြည့်ရ၏။ ထိုတည်နေရာနှင့် အိန္ဒိယစံတော်ချိန် ကွာခြားမှုကိုတွက်ရ၏။ ဤအခါတွင်မှ မွေးဖွားချိန်၏ အိန္ဒိယစံတော်ချိန်အမှန်ကိုရကာ မည်သည့်နက္ခတ် ထွန်းလင်းကြောင်း တွက်ချက်ရှာဖွေ၍ရလေသည်။


သို့သော် ...
ထိုပုဂ္ဂိုလ် မွေးဖွားချိန်ကို မည်သည့်နာရီ ဖြင့် မှတ်သားခဲ့သနည်းဆိုခြင်းက မေးခွန်းတစ်ခုရှိ၏။ မိခင်က မွေးခန်း၌ မွေးဖွားစဉ် ဖခင်ကအပြင်မှ နာရီကြည့်၍ အတိအကျမှတ်သားခဲ့သည်ပင်ဖြစ်စေကာမူ ထိုဖခင်၏နာရီက ဂရင်း နစ်စံတော်ချိန်နှင့် ကိုက် မကိုက် မသိနိုင်။ နာရီသည် စက်ပစ္စည်းဖြစ်၍ နောက်ကျနိုင် သည်။ မြန်နိုင်သည်။ မြန်မာစံတော်ချိန်ကို မြန်မာ့အသံမှ မကြာခဏ ကြေညာပေးနေသည် ကို ကြားဖူးကြပါသည်။ သို့သော် ထိုမြန်မာ့ အသံနာရီကြီးကိုလည်း မနက် ၆ နာရီတိုင်းမှာ အင်္ဂလန်မှ နာရီကြေညာသံနှင့်တိုက်ရသည်။ Midnight... London ဟု အသံကြားလျှင် မြန်မာနာရီ နံနက် ၆ နာရီကို ပြင်ပေးရလေသည်။


သို့ဖြစ်ရကား လူတစ်ယောက်၏ မွေးဖွားချိန်ကို အတည်ပြုပြီး ထိုကာလ၏နက္ခတ်များ အစွမ်းသက်ရောက်မှုကို ဟောကြားရခြင်းကား အတိအကျမှန်ရန် မလွယ်ချေ။ ထိုအခါ ရှေ့ ဖြစ်ဟောဆရာများက လူ၏လက်ဖဝါးပြင်ကို ကြည့်ရှုတိုက်ဆိုင်ကြပြန်သည်။ လူ၏လက် ဖဝါးပြင်ရှိ အရေးအကြောင်းများကိုကြည့်၍ ရှေ့ဖြစ်ဟောခြင်းပညာမှာ 'ကိုင်ရို'ကျမ်းဖြစ်၏။ ထိုပညာရပ်သည်လည်း အယူအဆ ရှုပ် ထွေးများပြားလှ၏။ လက်ဖမိုး၏ပုံသဏ္ဌာန်၊ လက်ချောင်းများ၏ပုံပန်းသဏ္ဌာန်စသဖြင့် ထွေပြားပေသည်။ ထို့ပြင် လက်ဖဝါးပြင်ရှိ အရေးအကြောင်းများက 'ပြောင်း'တတ်သည်ဟု ဆိုပြန်သည်။ ရှိပြီးအကြောင်းများ ပျောက် သွားကာ အရေးအကြောင်းအသစ်များ ပေါ် တတ်သေးသည်။ ဤကိစ္စကို အချိန်အခါ အသက်အရွယ်ဟု သတ်မှတ်ကြပြန်သည်။


သို့ဖြစ်ရာ ရှေ့ဖြစ်ဟောသော ရှေးဟောင်း ယဉ်ကျေးမှုသည် တိမ်ကောပပျောက်ခြင်းမဖြစ် သော်လည်း သိပ္ပံပညာ နည်းပညာ တိုးတက်လာသောအခါ လျော့နည်းလာခဲ့ရသည်။ ရှေးကအဆိုအမိန့်များဖြစ်သော 'သောကြာရေ ကြောင်း မသွားကောင်း' 'ပြဿဒါးနေ့' 'ရက်ရာဇာနေ့' စသည့်နေ့ရက်ရွေးပြီးမှ ခရီးသွား ခြင်းကိစ္စသည်လည်း ယခုကာလ၌ အလေးထားမှု နည်းပါးလာလေသည်။ နက္ခတ်၊ လက္ခဏာအပြင် ရှေ့ဖြစ်ဟော သော အခြားနည်းများစွာရှိသေးသည်။ ဥပမာ- တောင်တန်းဒေသများတွင် 'ကြက်ရိုးဗေဒင်'ဟူ၍ရှိ၏။ ကြက်ရိုးနှင့်ထိုး၍ အဆိုးအကောင်း ဟောခြင်းဟုဆိုသည်။ မြို့အများအပြားတွင် လမ်းလျှောက်ဟောသောဗေဒင်တစ်မျိုးလည်း ရှိ၏။ ၎င်းမှာ 'စာကလေးဗေဒင်'ဖြစ်၏။ ဟောစာများကို အသင့်ရိုက်နှိပ်ထားပြီး လှောင်အိမ် ထဲမှာ ထည့်ထားသောစာကလေးအား စာရွက်ကိုရွေးစေခြင်းဖြစ်၏။


စာကလေးက အစာမှတ်ပြီး နှုတ်သီးဖြင့် ကောက်ချီလိုက်သောစာရွက်သည် မိမိအတွက် အဆိုးအကောင်းအဟောတည်း။ အချို့သူများ က စာအုပ်ကြီးတစ်အုပ် ဆောင်ထားသည်။ အပ်ချည်ကြိုးတစ်ကြိုး ညှပ်ထားသည်။ ဗေဒင် မေးလိုသူကိုယ်တိုင် မိမိလက်ဖြင့် အပ်ချည် ကြိုးကိုကိုင်ပြီး စာအုပ်ကြား ဆွဲညှပ်ရသည်။ ကြိုးကိုယူပြီး ပေါ်လာသောစာမျက်နှာမှာ ထိုသူအတွက် အဆိုးအကောင်းအဟောပင်ဖြစ်သည်။ လူသည် အတ္တအကျဉ်းသားများဖြစ်၏။မိမိအတွက် စဉ်းစား၏။ မိမိချမ်းသာချင်၏။ အဆိုးကို ဖယ်ချင်၏။ မိမိအနာဂတ်ကို စိတ်ဝင်စား၏။ အန္တရာယ်ပေါ်လျှင် အားကိုးရှာ၏။ အထက်ပါစိတ်အရည်အသွေးများကြောင့် လူအများအပြားသည် မိမိအနာဂတ်အတွက် ရှေ့ဖြစ်မေးနေကြဦးမည်။ ဟောသည့်သူများ ကလည်း မိမိသန်ရာနည်းဖြင့် ဟောနေကြဦးမည်။ မှန်တာလည်းရှိမည်။ လွဲတာလည်းရှိမည်။ တိုက်ဆိုင်လျှင် မှန်သည်ဟုနာမည်ကောင်း ရမည်။ အားကိုးရှာချင်သူများကား ငွေကုန်ခံကာ မေးနေကြဦးမည်။


အကောင်းဟောလျှင် ဝမ်းသာမည်။ အဆိုးဟောလျှင် အားလျော့မည်။ သို့သော် အားလျော့ရန်မလို။ မကောင်းတာတွေအတွက် ပပျောက်အောင်ပြုလုပ်နည်းရှိသည်ဟုဆိုသည်။ 'ယတြာ'ဖြစ်၏။ ပိုက်ဆံမကုန်သောနည်းလည်း ရှိသည်။ ပိုက်ဆံအကုန်အကျများသောနည်း လည်းရှိသည်။ ဟောသူနှင့် မေးသူအကြား သဘောတူလျှင် ပြီးသည်။ အချို့လူများ ဗေဒင် ဟောခ များများမယူဘဲ ယတြာဖိုးကို သိန်း သောင်းယူသည်။ ကြောက်လည်းကြောက် ယုံလည်းယုံ တတ်လည်းတတ်နိုင်သူများက ပေး ကြသည်။ အဆင်ပြေသွားတာလည်းရှိမည်။ မမှန်ကောင်းလားဟု ဆရာကို သွား၍ရန်ထောင်တာမျိုးကား မရှိ။ ကံကို ပုံချလိုက်ကြသည်။


မည်သို့ဆိုစေ ...
ဤလောက၌ မိမိကိုယ်မိမိ အားမကိုးနိုင်သူများ၊ စိတ်အားငယ်သူများ၊ လောကဓံ သဘောတရားကို မခံနိုင်သူများအပြင် 'လိုရ မယ်ရ'သဘောမျိုး အနိမ့်အညံ့ သိရအောင် ဆိုသူများရှိနေသရွေ့ ရှေ့ဖြစ်ဟောသောယဉ် ကျေးမှုသည် တည်ရှိနေဦးမည်သာ။ ဗုဒ္ဓဘာသာက ကံကံ၏အကျိုးအတိုင်း မိမိပြုသမျှ မိမိခံရမည်။ ကောင်းတာပြုလျှင် ကောင်းတာဖြစ်မည်ဟု ဆုံးမထားသော်လည်း ကုသိုလ်ပြုရန် ဘုရားသွားရင်းပင် ရှေ့ဖြစ်ဟော ခန်းဝင်တတ်ကြသဖြင့် ဘုရားပရိဝုဏ်အနီး ရှေ့ဖြစ်ဟောခန်းတွေ စည်စည်ကားကားရှိနေသည်ကို ဘုရားတိုင်းလိုလိုမှာ မြင်နိုင်ပါသည်။ လူသည် မိမိအကြောင်း စိတ်ဝင်စားမြဲ ဖြစ်နေသမျှကာလပတ်လုံး ရှေ့ဖြစ်ဟောယဉ် ကျေးမှုသည်လည်း ကမ္ဘာတည်သရွေ့ တည် နေဦးမည်မလွဲပေ။ 

ရွှေကူမေနှင်း

#theyangontimes

 

Rate this item
(1 Vote)
back to top