HIGHLIGHT NEWS
Main menu

Article [-- ဆောင်းပါများ ကဏ္ဍ --]

သူရဲကောင်း (ရဲဘော်သုံးကျိပ်)တို့ လဲလျောင်းရန် မြေတစ်နေရာ  

သူရဲကောင်း (ရဲဘော်သုံးကျိပ်)တို့ လဲလျောင်းရန် မြေတစ်နေရာ   

မောင်ဆန္ဒ(လယ်ဝေး)

 **************************

ရဲဘော်သုံးကျိပ်ဟုပြောလိုက်လျှင် မြန်မာပြည် လွတ်လပ်ရေးရရန် ဂျပန်ပြည်သို့ စစ်ပညာသွား ရောက်သင်ယူပြီး အသက်ပေးတိုက်ခိုက်သူများဟု မြန်မာတိုင်းရင်းသားမှန်သမျှ သိကြသည်။ ထို့နောက် ရဲဘော်သုံးကျိပ်ကို ဦးစီးခေါင်းဆောင်သူမှာ လွတ်လပ်ရေးဖခင်ကြီး ဗိုလ်ချုပ်အောင်ဆန်းဟု သိကြပြန်သည်။ ဂျပန်ပြည်၌ စစ်ပညာသင်နေစဉ် ဗိုလ်ချုပ်အောင်ဆန်းက (အိုမိုဒါမွန်ဂျီ)ဟူသော ဂျပန်အမည်ခံယူပြီး တော်လှန်ရေးကာလတွင် ဗိုလ်တေဇဟု ဗိုလ်ဘွဲ့ခံခဲ့သည်။ ဗိုလ်ဘွဲ့ခံချင်၍မဟုတ်။ နောက်ပိုင်းတွင် ကျန်ရစ်သော မိဘဆွေမျိုးများကို အကြောင်းရှာ နှိပ်စက်မှုမခံရစေရန် နာမည်ဝှက်ယူခြင်းဖြစ်သည်။

ရဲဘော်သုံးကျိပ် စာရင်းကို မော်ကွန်းတင်ရသော်- သခင်ရှုမောင်က (တကာစုငိစုစုမု)၊ ဗိုလ်နေဝင်း။ သခင်ကျော်စိန်က (တကာဟာရှီ)၊ ဗိုလ်မိုးညို။ သခင်ခင်မောင်ဦးက (မွန်ရမာဆာရု)၊ ဗိုလ်တာရာ။ သခင်ငွေက (ကက်ဆူရာ)၊ ဗိုလ်စောအောင်။ သခင်စောလွင်က (ယာမာအိုကီရိုရှီ)၊ ဗိုလ်မင်း ခေါင်။ သခင်စံမြင့်က (နာကာဝါဝါအီချီရို)၊ ဗိုလ်တောက် ထိန်။ သခင်စံလှိုင်က (အိုမူရာတာဒါရှီ)၊ ဗိုလ်အောင်။ သခင်စိုးက (ကိုဒို)၊ ဗိုလ်မြင့်အောင်။ ကိုဆောင်းက (မွန်ရဟီရိုရှီ)၊ ဗိုလ်ထိန်ဝင်း။ သခင်တင်အေးက (ချင်းဒါစိန်ဂျီ)၊ ဗိုလ်အုန်းမြင့်။ သခင်ထွန်းခင်က (နာကာမူရာဟီတိုရှိ)၊ ဗိုလ် မြင့်ဆွေ။ ကိုထွန်းရှိန်က (ယာမာရှိတာတေရုအို)၊ ဗိုလ်ရန်နိုင်။ သခင်ထွန်းရွှေက (ဘုဆုမိစုစုမု)၊ ဗိုလ်လင်းယုန်။ သခင်ထွန်းလွင်က (အိုတာနီဟီရိုရှိ)၊ ဗိုလ်ဗလ။ သခင်ထွန်းအုပ်က (အိချီဟာရအိရှီရို)၊ ဗိုလ်ဘွဲ့ မခံခဲ့။ သခင်ဗဂျမ်းက (ဘာဘာတာကေရှီ)၊ ဗိုလ်လ ရောင်။ သခင်မောင်မောင်က (ဆုချီယ)၊ ဗိုလ်ဥာဏ။ ကိုရွှေက (တာနီငုချီရှင်အီချီ)၊ ဗိုလ်ကျော်ဇော။ သခင်လှက (အီတိုဟီတိုရှီ)၊ ဗိုလ်မင်းရောင်။ သခင်လှဖေက (တာနီကီယိုရှီ)၊ ဗိုလ်လက်ျာ။ သခင်လှမောင်က (ဂါမာဆာရှီ)၊ ဗိုလ်ဇေယျ။ သခင်လှမြိုင်က (အီတိုဒါကေအိချိ)၊ ဗိုလ်ရန် အောင်။ သခင်သစ်က (အိုဆာဝါ)၊ ဗိုလ်စောနောင်။ဘသခင်သန်းတင်(၁)က (ယာမာဒါ)၊ ဗိုလ်သန်းတင်။ သခင်သန်းညွန့်က (အိုကာဝါ)၊ ဗိုလ်ဇင်ယော်။ သခင်သန်းတင်(၂)က (ဆူဘိုတာ)၊ ဗိုလ်မြဒင်။ သခင်အေးမောင်က (မစ်ဇူနိုဆာဘူရှိ)၊ ဗိုလ်မိုး။ သခင်အောင်သန်းက (ဟီရာတာမာဆာအို)၊ ဗိုလ်စကြာ။ ကိုအောင်သိန်းက (ဟာယာရှီ)၊ ဗိုလ်ရဲထွဋ် တို့ ဖြစ်ကြသည်။


၁၉၃၉၊ ၁၉၄ဝ ဝန်းကျင်တွင် မြန်မာပညာတတ် လူငယ်များသည် နယ်ချဲ့အင်္ဂလိပ်ကို ပြည်ပမှ စစ်ရေး အကူအညီရယူလျက် တိုက်ထုတ်ရန်သဘောတူခဲ့သည်။ ယင်းအတွက် ပြည်ပအကူအညီရှာဖွေရန် သခင်အောင်ဆန်းနှင့် သခင်လှမြိုင်တို့သည် ၈.၈. ၁၉၄ဝ ပြည့်နှစ်တွင် တရုတ်ပြည်သို့ ဟိုင်လီသင်္ဘော ဖြင့်ထွက်ခဲ့သည်။ သခင်အောင်ဆန်းက တရုတ်အမည် တန်လွန်ရှောင်ဟု အမည်ခံပြီး၊ သခင်လှမြိုင်က တန်ဆူတောင်ဟု အမည်ခံခဲ့သည်။ တိုင်းပြည်လွတ်လပ်ရေးအတွက် အသက်ပင် သေသေ၊ ရက်ရက်မရွံ့၊ နောက်မတွန့်ဘဲထွက်ခဲ့ရာ တွင် သူတို့မရောက်ဖူးသောအရပ်၊ သူတို့မသိသော လူတွေနေထိုင်ရာသို့ ထွက်လာခြင်းဖြစ်သည်။ လူငယ်ပီပီ စွန့်စားခဲ့ကြသော်လည်း သူတို့သည် မှောင်မိုက်သည့်လကွယ်ညတွင် ကမ်းမမြင်၊ လမ်းမမြင်ခရီးကို လှမ်းလျှောက်ခဲ့ခြင်းဖြစ်သည်။ သာမန်အားဖြင့် အားကိုးအားထားပြုရာ မိတ်ဆွေမရှိသောအရပ်ကို ကံကြမ္မာအားကိုးပြီး စွန့်စားခဲ့ကြခြင်းဖြစ်သည်။ သာမန်လူတို့ စွန့်စားဝံ့ကြမည်မဟုတ်ပေ။


သူတို့သည် တရုတ်ပြည်၌ ယောင်လည်လည်ဖြစ် နေရာ၊ ပါလာသည့် ငွေကြေးက ပြတ်လပ်သွားသဖြင့် ကလေးတွေကို အင်္ဂလိပ်စာပြပေးရင်း အသက်ဆက်ခဲ့ရသည်။ ထိုအချိန်နောက်ပိုင်းတွင် ကျန်ရစ်သော လူကြီးများက အဆက်အသွယ်ရှာရာ ဂျပန်ဘုရင်၏ ဦးစီးချုပ် ဗိုလ်မှူးကြီး ဆူဇူကီးနှင် အဆက်အသွယ်ရသည်။ သခင်မြက လူငယ်နှစ်ဦး၏ အခြေအနေကိုရှင်း ပြပြီး အကူအညီတောင်းရာ ဂျပန်နှင့် အဆက်အသွယ်ရသည်။ စစ်ရေးအကူအညီပေးမည်ဟု ကတိရ၍ စစ်ပညာသင်ရန် ဂျပန်သို့ထွက်ခဲ့သည်။ ဂျပန်ခေါင်း ဆောင်များနှင့် အကျေအလည်ဆွေးနွေးပြီး စစ်ပညာသင်မည့် လူငယ်များကို ပြန်ခေါ်စေသည်။


၁၉၄၁ ခုနှစ် မတ်လ ၁ဝ ရက်နေ့တွင် ပထမအသုတ် အဖြစ် သခင်လှဖေ၊ သခင်ဗဂျမ်း၊ သခင်အေးမောင်၊ ကိုထွန်းရှိန်တို့ပါဝင်သည်။ ၁၉၄၁ ခုနှစ် ဧပြီလ ၁၃ ရက်နေ့တွင် ဒုတိယအသုတ် အဖြစ် သခင်စိုး၊ သခင်စောလွင်၊ သခင်သန်းတင်၊ ဗိုလ်မြဒင်၊ ကိုရွှေ၊ သခင်တင်အေး၊ သခင်အောင်သိန်း၊ သခင်ထွန်းရွှေတို့လိုက်ပါသည်။ ၁၉၄၁ ခုနှစ် မေလတွင် တတိယအသုတ်အဖြစ် ကိုလှမောင်၊ သခင်စံမြ၊ သခင်ခင်မောင်ဦးတို့ ပါလာ သည်။ ၁၉၄၁ ခုနှစ် ဇူလိုင်လ ၈ ရက်နေ့တွင် စတုတ္ထ အသုတ်အဖြစ် သခင်ထွန်းအုပ်၊ သခင်ရှုမောင်၊ သခင်စံလှိုင်၊ သခင်ထွန်းခင်၊ သခင်လှ၊ သခင်သန်းညွန့်၊ သခင်ကျော်စိန်၊ သခင်မောင်မောင်၊ သခင်ငွေ၊ သခင်သစ်၊ သခင်ထွန်းလွင်တို့ လိုက်ပါလာသည်။ သခင်အောင်သန်း၊ ကိုဆောင်း၊ သခင်သန်းတင်တို့သည် ယိုးဒယား(ထိုင်း)မှတစ်ဆင့် ဂျပန်နိုင်ငံကို ကြိုတင်ရောက်နေသည်။ စစ်ပညာသင်ရန် ရဲဘော်သုံးကျိပ်၊ သူရဲကောင်းသုံးဆယ်သည် ဂျပန်ပြည် ဟိုင်နန်ကျွန်းတွင် စုမိခဲ့ကြပေပြီ.......


ဟိုင်နန်ကျွန်း၊ စန်ယ တောင်သူလယ်သမားကျောင်းတွင် ၂၅.၄.၁၉၄၁ မှ ၅.၁ဝ.၁၉၄၁ ခုနှစ်ထိ စစ်ပညာသင်ပြီး ၂၇.၁၂.၁၉၄၁ တွင် ထိုင်းနိုင်ငံ ဘန်ကောက်ရှိ ဘီအိုင်အေ ဗမာ့လွတ်လပ်ရေးတပ် မတော်ကို ဖွဲ့စည်းခဲ့သည်။ လွတ်လပ်ရေးမရသမျှ သွေးမကွဲ၊ စည်းလုံးမှုမပျက်သစ္စာစောင့်သိမည်ဟု ကတိပြုလျက်သွေးသောက်ခဲ့ကြသည်။ ၂၂.၁.၁၉၄၂ ရက်နေ့တွင် ဗမာ့လွတ်လပ်ရေး တပ်မတော်မြန်မာပြည်တွင်ဝင်ခဲ့သည်။ ဗိုလ်ချုပ်အောင်ဆန်းဦးစီးသော ရဲဘော်သုံးကျိပ်သည် နယ်ချဲ့ကို တိုက်ထုတ်ရာတွင် သခင်ငွေ(ဗိုလ်စောအောင်)သည် ရွှေကျင်တိုက်ပွဲတွင် ကျဆုံးသည်။ သခင်မောင်မောင် (ဗိုလ်ဥာဏ)သည် ၁၉၄၂ ခုနှစ်တွင် ဖာပွန်၌ကျသည်။ သခင်အေးမောင် (ဗိုလ်မိုး) သည် ၁၉၄၂ ခုနှစ်တွင် ထူးကြီးတိုက်ပွဲ၌ကျသည်။ ကိုဆောင်း (ဗိုလ်ထိန်ဝင်း)သည် ၁၉၄၅ ခုနှစ် နိုဝင်ဘာလတွင် ထိုင်းနိုင်ငံ လန်ပန်မြို့၌ ကွယ်လွန်သည်။ သခင်သန်းတင်(၂) (ဗိုလ်မြဒင်)သည် ၁၉၄၂ ခုနှစ်တွင် ထိုင်းနိုင်ငံနယ်စပ်တွင် ငှက်ဖျားရောဂါဖြင့် ကွယ်လွန်သည်။


လွတ်လပ်ရေးရပြီး ကွန်မြူနစ်ပါတီ တောခိုချိန်တွင် ပါသွားသည့် သခင်လှမြိုင် (ဗိုလ်ရန်အောင်)သည် တောတွင်း၌ သတ်ဖြတ်ခံရသည်။ သခင်လှမောင် (ဗိုလ်ဇေယျ)သည် တောတွင်း၌ ကျဆုံးသည်။ ဗိုလ်ချုပ်အောင်ဆန်းသည် ဂဠုန်ဦးစောက လုပ်ကြံ၍ ၁၉၄၇ ခုနှစ်တွင် ကျဆုံးသည်။ မြန်မာပြည်လွတ်လပ်ရေးအတွက် အသက်ပေး ဆောင်ရွက်ရန် အဓိဋ္ဌာန်ပြုခဲ့သော ရဲဘော်သုံးကျိပ်သည် လွတ်လပ်ရေးကိုပင် မမြင်တွေ့လိုက်ဘဲ ဆုံးရှုံးသူတွေလည်းရှိသည်။ လွတ်လပ်ရေးရပြီးနောက် ယုံကြည်ရာလုပ်ကိုင်ရင်း အသက်ဆုံးရှုံးသူတွေလည်းရှိ သည်။ အချို့ကမူ ဇာတိ၊ ဇရာ၊ မရဏ သဘောအရ ကွယ်လွန်သူတွေလည်းရှိသည်။ ယခုအချိန်တွင် ရဲ ဘော်သုံးကျိပ်ဝင် သူရဲကောင်းများတစ်ယောက်မျှ မကျန်တော့။ လူပင်သေကြသော်လည်း သူတို့သမိုင်းကမူ မပျောက်မပျက်ရှိနေသည်။ ကမ္ဘာတည်သရွေ့၊ မြန်မာပြည်ရှိနေသရွေ့၊ ရဲဘော်သုံးကျိပ် သမိုင်းတည်နေမည်ဖြစ်သည်။ သို့သော်-


သတင်းတစ်ပုဒ်ကို အွန်လိုင်းပေါ်တွင် ဖတ်လိုက်သည်။ ရဲဘော်သုံးကျိပ်ဝင် သခင်သန်းညွန့်(ဗိုလ်ဇင်ယော်)သည် မကြာသေးသော ကာလကမှ ကွယ်လွန်ရာ သူ့ကိုလေးစားသော အနှီပုဂ္ဂိုလ်က ဗိုလ်ဇင်ယော်အား ဂါရဝပြုရန် ထိန်ပင်သုသာန်သို့ သွားခဲ့သည်။ ရွှံ့တော၊ ဗွက်တောထဲတွင် လဲလျောင်းမှေးစက်နေသော ဗိုလ်ဇင်ယော်၊ ဗိုလ်လင်းယုန်၊ ဗိုလ်စောနောင်၊ ဗိုလ်စောအောင်၊ ဗိုလ်မင်းခေါင်၊ ဗိုလ်တာရာ၊ ဗိုလ်မြင့်ဆွေတို့၏ သင်္ဂြီုဟ်ရာ သင်္ချီုင်းကိုမြင်ရသည်။ အလျားရှစ်ပေ၊ အနံတစ်ပေ၊ အမြင့်ကိုးလက်မသာရှိသော အထိမ်းအမှတ်အောက် သင်္ချီုင်းမြေတွင် ညှိုးငယ်စွာ လဲလျောင်းနေကြသည်ကို တွေ့ခဲ့ရသည်။ လက်တွေ့ မြင်ခဲ့သူမဆိုထားနှင့် တစ်ဆင့်စကားကြားရသူ ကျွန်တော်ပင် စိတ်မကောင်းနိုင်။ တိုင်းပြည်အတွက် အသက်ပေးပြီး လွတ်လပ်ရေးရအောင် ဆောင်ရွက်ခဲ့သည့် ရဲဘော်သုံးကျိပ်သည် ဤအဆင့်နှင့်သာ ထိုက်တန်သလော...မြန်မာပြည် သူတွေ လွတ်လပ်ရေးရဖို့ စွန့်လွှတ်စွန့်စားလုပ်ခဲ့သူ တွေ၏ ဆုလာဘ်က ဤမျှသာရှိသလား..သာမန်လူကို မြှုပ်နှံထားသည်ထက် နိမ့်ကျနေသည်မှာ မဖြစ်သင့်။


ရဲဘော်သုံးကျိပ်ကို ခေါင်းဆောင်ခဲ့သည့် ဗိုလ်ချုပ်အောင်ဆန်းသာ အာဇာနည်ပုဂ္ဂိုလ်စာရင်းမဝင်ခဲ့လျှင် အခြားရဲဘော်သုံးကျိပ်နှင့်အတူ ထိန်ပင်သုသာန် ချောင်တွင် ညှိုးငယ်စွာထားလေမလားမသိ။ အမှန်တော့ သူရဲကောင်းဟု သမုတ်ထိုက်သော ဤ ရဲဘော်သုံးကျိပ်ကို မြင့်မြတ်သည့်နေရာတစ်နေရာတွင် စုစုစည်းစည်း၊ သပ်သပ်ရပ်ရပ်၊ ဂုဏ်ရည်တင့်တင့်ထားသင့်သည်။ နှောင်းလူငယ်တို့ကို ရဲဘော်သုံးကျိပ်အကြောင်းပြောပြ့ပီး သူရဲကောင်းစိတ်ဓာတ်ကိန်း အောင် ပြသင့်သည်။ ဂုဏ်ရှိစေချင်သည်။ ယခုတော့  ရဲဘော်သုံးကျိပ်လဲလျောင်းဖို့ မြေတစ်နေရာစာတော့ ရှိသင့်သည်ထင်ပါသည်။ ။
x x x x

မောင်ဆန္ဒ(လယ်ဝေး)

 

#democracytoday

Rate this item
(0 votes)
back to top