HIGHLIGHT NEWS
Main menu

Editorials [-- အယ်ဒီတာ့အာဘော် --]

တစ်ကျော့ပြန် မြစ်ဆုံအရေး

တစ်ကျော့ပြန် မြစ်ဆုံအရေး

နယ်စပ်ဒေသနှင့် တိုင်းရင်းသားလူမျိုးများ ဖွံ့ဖြိုးတိုးတက်မှု အကောင်အထည်ဖော်ရေး ဗဟိုကော်မတီဥက္ကဋ္ဌ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် ကချင်ဒေသ အထူးခရီးစဉ်ကို ဇန်နဝါရီ ၈ ရက်မှ ၁၁ ရက်အထိ သုံးရက်ကြာသွားရောက်ခဲ့သည်။ ယင်းခရီးစဉ်အတွင်း မဂွေဇ-ဆန်းလွတ်ချက်တောင်ထိပ်( ၃၃ မိုင် ၆ ဖာလုံ )လမ်းပိုင်း ဖွင့်လှစ်ခြင်း၊ အထက်နမ့်ထွမ်ရေအားလျှပ်စစ်စီမံကိန်း ဖွင့်လှစ်ခြင်း၊ (၇၁)နှစ်မြောက် ကချင်ပြည်နယ်နေ့အခမ်းအနားသို့ တက်ရောက်ခြင်းများအပြင် ဒေါ်အောင် ဆန်းစုကြည်သည် ကချင်မနောပွဲသို့ တက်ရောက်ခြင်း၊ ဒေသခံများနှင့် တရင်းတနှီး တွေ့ဆုံခြင်း၊ စားနပ်ရိက္ခာများ ထောက်ပံ့ပေးအပ်ခြင်းများကိုလည်း ဆောင်ရွက်ခဲ့သည်။

ယင်းခရီးစဉ်တွင် ဒေသခံ ကချင်ပြည်သူများသည် နိုင်ငံတော်၏အတိုင်ပင်ခံပုဂ္ဂိုလ်ထံမှ ဒေသတွင်း ဖွံ့ဖြိုးတိုးတက်မှုများအပါအဝင် ကချင်လူမျိုးများ၏ ကာလရှည်ကြာစွာ မက်ခဲ့ရသော မျှော်လင့်ချက် အိပ်မက်များကိုလည်း ငံ့လင့်ခဲ့ကြမည်ဖြစ်သည်။ လတ်တလောတွင်မူ ၎င်းတို့သည် ဒေါ်အောင်ဆန်းစုကြည်ထံမှ ခွန်အားရှိသော စကားလုံးများနှင့်အတူ အနာဂတ်မြေပုံကိုသာလျှင် ခပ်ရေးရေး တွေ့မြင်ခဲ့ရသည်။ ဒေါ်အောင်ဆန်းစုကြည်က ဒီမိုကရေစီဖက်ဒရယ်ပြည်ထောင်စု အစစ်အမှန်ဖြစ်ရန်အတွက် အစိုးရနှင့်ပြည်သူ ဝိုင်းဝန်း ကြိုးစားဖို့လိုကြောင်း၊ အစိုးရတစ်ခုတည်းကိုပဲ အားကိုးသည်ဆိုလျှင် ဒီမိုကရေစီမဆန်ကြောင်း၊ ဒီမိုကရေစီသည် ပြည်သူလူထုကို အခြေခံသောစနစ်မို့ ပြည်သူလူထု၏အားကို အစိုးရက ပြန်ပြီးအားကိုးရပါတယ်''ဟု (၇၁)နှစ်မြောက် ကချင်ပြည်နယ်နေ့အခမ်းအနားတွင် ထည့်သွင်းပြောဆိုသွားသည်။ ထို့အတူ မြစ်ဆုံစီမံကိန်းနှင့် စပ်လျဉ်း၍လည်း နိုင်ငံတော်အတိုင်ပင်ခံက ဆက်လုပ်၊မလုပ်ဟူသည့်အဖြေကို တိကျစွာပေးခြင်းမျိုးမရှိဘဲ ယင်းသည် တိုင်းပြည်ရဲ့ဂုဏ်သိက္ခာနဲ့ဆိုင်ကြောင်း၊ တိုင်းပြည်ရဲ့ အနာဂတ်အကျိုးစီးပွားနဲ့ဆိုင်ကြောင်း၊ ယင်းအပေါ်တွင် အခြေခံစဉ်းစားပြီး ဆောင်ရွက်ရမည့်ကိစ္စဖြစ်ကြောင်း ပြောဆိုခဲ့သည်ဟု သတင်းများက ဖော်ပြသည်။


ယင်းသတင်းအပေါ် အခြေခံလျက် ဇန်နဝါရီ ၁၃ ရက်က တရုတ်သံရုံး၏ သတင်းထုတ်ပြန်ချက်တစ်ရပ်တွင် ကချင်ပြည်နယ် ဒေသခံတိုင်းရင်းသား ပြည်သူများသည် မြစ်ဆုံရေအား လျှပ်စစ်စီမံကိန်းကို ကန့်ကွက်မှုမရှိကြောင်း စီမံကိန်းကို ဆန်ကျင်ကန့်ကွက်သည်မှာ ပြင်ပမှလူနှင့် အဖွဲ့အစည်းများဖြစ်ကြောင်း ပါရှိခဲ့သည်။ ယင်းထုတ်ပြန်ချက်အပေါ် ကချင် နိုင်ငံရေးပါတီခေါင်းဆောင်များ၊ အစိုးရမဟုတ်သော အဖွဲ့အစည်းများမှ ခေါင်းဆောင်များက မြစ်ဆုံနှင့်ပတ်သက်သည့် တရုတ်သံအမတ်၏ သဘောထားထုတ်ပြန်ချက်မှာ လွဲမှား နေကြောင်း မီဒီယာများမှတစ်ဆင့် ပြန်လည်ရှင်းလင်းပြောကြားသည်များလည်း ရှိခဲ့သည်။ ဒီချုပ်ပါတီ၏ ပြောရေးဆိုခွင့်ရပုဂ္ဂိုလ် ဒေါက်တာမျိုးညွန့်ကမူ မြစ်ဆုံစီမံကိန်းနှင့်ပတ်သက်၍ လက်ရှိအစိုးရနှင့် သဘောထားကွဲလွဲစရာမရှိကြောင်း၊ ပြည်သူလူထု၏သဘောထားကိုသာ အမျိုးသားဒီမိုကရေအဖွဲ့ချုပ်က အဓိကဦးစားပေးဆောင်ရွက်မည်ဖြစ်ကြောင်း ပြောကြားသည်။


ချုပ်၍ဆိုရလျှင်မူ ယခင်အစိုးရလက်ထက်က စသွားခဲ့သော မြစ်ဆုံကိစ္စသည် စကတည်းက ယဉ်သကိုဆိုသလို လိပ်ခဲတည်းလည်းဖြစ်နေခဲ့ပြီး နိုင်ငံတော်အတိုင်ပင်ခံ၏ကချင် ခရီးစဉ်အပြီးတွင် တစ်ဖန်ပြန်၍ ဂယက်ဖြစ်လာခဲ့သည်။ လက်ရှိနိုင်ငံတော်အစိုးရသည် ရခိုင်အရေးကိစ္စ၊ ငြိမ်းချမ်းရေးကိစ္စများဖြင့် ခေါင်းခဲနေရဆဲပင်ဖြစ်ပြီး ယခုအခါ မြစ်ဆုံကိစ္စသာ တစ်ကျော့ပြန် ခေါင်းထောင်လာမည်ဆိုပါက နူရာဝဲစွဲ၊ လဲရာသူခိုးထောင်းဆိုသကဲ့သို့ အကျပ်အတည်းတွင်းသို့ ကျရောက်နိုင်ဖွယ်ရှိသည်။ အစိုးရ၏အကျပ်အတည်းသည် ပြည်သူ၏ အကျပ်အတည်းဖြစ်၍ ပြည်သူ၏ အခက်အခဲသည်လည်း အစိုးရ၏အခက်အခဲပင်ဖြစ်ရာ ဖြစ်ပေါ်လာသော တစ်စုံတရာပြဿနာတိုင်းတွင် အစိုးရနှင့်ပြည်သူ အပြန်အလှန်ထိန်း ကျောင်းခြင်းဖြင့်သာ အခက်အခဲများကို ဖြေရှင်းသင့်ပါကြောင်း ရန်ကုန်တိုင်းမ်၏ သဘောထားအား ရေးသားလိုက်ရပါသည်။


အယ်ဒီတာ

#theyangontimes

 

Rate this item
(0 votes)

Latest from M Bwe

back to top