HIGHLIGHT NEWS
Main menu

Editorials [-- အယ်ဒီတာ့အာဘော် --]

ဝိသမစိတ်ကို ဖယ်ရှား၊ ပြည်သူများကို ပရဟိတစိတ်ဖြင့် ကူညီ

ဝိသမစိတ်ကို ဖယ်ရှား၊ ပြည်သူများကို ပရဟိတစိတ်ဖြင့် ကူညီ

မြန်မာ့စီးပွားရေးသည် ဂျက်လေယာဉ်ကဲ့သို့ အရှိန်အဟုန်ဖြင့်ထိုးတက်သွားမည်ဟု ယခင်စီမံဘဏ္ဍာပြည်ထောင်စုဝန်ကြီးဟောင်းတစ်ဦး ပြောခဲ့ဖူးသည့်အတိုင်း လက်တွေ့ဖြစ်မလာသေးသော်လည်း ဒေါ်လာငွေလဲ နှုန်းနှင့်စက်သုံးဆီဈေးတို့ကတော့ ဂျက်လေယာဉ်မက၊ အာကာသလွန်းပျံ ယာဉ်ကဲ့သို့ဆက်လက်ထိုးတက်လျက်ရှိရာလက်ရှိတွင်အခြေခံစားသောက်ကုန်များနှင့်အတူ ဆေးဝါးဈေးကွက်ကိုလည်းသက်ရောက်ထိခိုက်လာနေပြီ ဖြစ်ပေသည်။

လတ်တလော၌ ဒေါ်လာဈေးမြင့်တက်မှုကြောင့် ဆေးဝါးအချို့ဈေး မြင့်တက်လာသည်နှင့်အတူဆေးကုမ္ပဏီအချို့အရောင်းပိတ်ထားမှုတို့ ရှိလာသည်ဟုကြားသိရပေ၏။ မည်သို့ပင်ဆိုစေ ဒေါ်လာဈေးတက်ပါက ပြည်ပမှ မှာယူတင်သွင်းရသည့် ကုန်စည်တို့မလွှဲမသွေဈေးတက်မည်ကသေချာပေရာ နောက်ဆက်တွဲအရ ပြည်တွင်းဈေးကွက်အပေါ် ဆိုးဆိုးရွားရွားသက်ရောက် လာနိုင်ပေသည်။

 

သို့သော် ဤသို့ဆေးဝါးများဈေးတက်ခြင်းနှင့် အချို့ယာယီအရောင်းရပ် ဆိုင်းထားခြင်းနှင့်ပတ်သက်၍ မြန်မာနိုင်ငံဆေးနှင့်ဆေးပစ္စည်းကုန်သည်များနှင့်လုပ်ငန်းရှင်များအသင်းမှ ထုတ်ပြန်ခဲ့သည့်မေတ္တာရပ်ခံချက်ကအလွန် ထူးခြားသည်ဟုဆိုနိုင်ပေသည်။ ယင်းထုတ်ပြန်ချက်၏ဆိုလိုရင်းမှာဒေါ်လာ ဈေးမြင့်တက်မှုကြောင့် လုပ်ငန်းရှင်များ အခက်အခဲကြုံရသည်ကိုသိရှိပါ ကြောင်း၊ြေ<ွကးစနစ်ဖြင့်ရောင်းချထားသည့်အတွက် အကြွေးများပြန်လည်ရရှိ ချိန်၌လက်ရှိဒေါ်လာပေါက်ဈေးနှင့်မကိုက်တော့သဖြင့် ထပ်မံမဝယ်ယူနိုင်ဘဲ အရှုံးနှင့်ရင်ဆိုင်ရသည်ကို သိရှိပါကြောင်း ဆိုပေ၏။


သို့ဖြစ်သော်လည်း ဆေးရုံဆေးခန်းများ၊ ဆရာဝန်ကြီးများ၊ လူနာများ ထံသို့ရောင်းချရာတွင် ဈေးနှုန်းကြီးမြင့်စွာဝယ်ယူသုံးစွဲနေရခြင်းမျိုးမဖြစ်ပေါ်လာစေရန်ပရဟိတစိတ်ဓာတ်ဖြင့်သဘောထားကြီးစွာလူနာအကျိုးမျှော်ကိုး ၍အနည်းဆုံးနှင့်အသင့်လျော်ဆုံးနှုန်းထားဖြင့်သာ ရောင်းချပေးကြပါရန်မေတ္တာရပ်ခံထားပေ၏။ ထို့အပြင် ဈေးကွက်တွင်ဆေးဝါးပြတ်လတ်မှုမဖြစ် ပေါ်စေရန်ယာယီအရောင်းရပ်ခြင်းများတတ်နိုင်သမျှမပြုလုပ်ကြပါရန်လည်း ပြည်သူ့ကျန်းမာရေးစောင့်ရှောက်မှုအကျိုးကိုရှေးရှု၍ မေတ္တာရပ်ခံအသိပေး နှိုးဆော်ကြောင်း ထုတ်ပြန်ထားခြင်းဖြစ်သည်။


ယင်းထုတ်ပြန်ချက်သည်လုပ်ငန်းရှင်များအပေါ် မည်မျှသက်ရောက်မှုရှိ၊ မရှိကိုမပြောနိုင်သော်လည်း စီးပွားရေးလောကအတွင်းမြင်တွေ့ရခဲသည့် သဘောထားတစ်ခုအဖြစ်တလေးတစားအသိအမှတ်ပြုလိုပေသည်။အထူးသဖြင့်မူ ပရဟိတစိတ်ထား၊ ပြည်သူ့ကျန်းမာရေးစောင့်ရှောက်မှုအကျိုးကိုရှေးရှု၍စသောအသုံးအနှုန်းများက မိမိတို့၏စိတ်နှလုံးကိုလှိုက်လှဲစွာ ရိုက်ခတ်စေပေ၏။


စီးပွားရေးဟူသည်ငွေကြေးအကျိုးအမြတ်အတွက်သာ အဓိကလုပ်ကိုင် ခြင်းဖြစ်၍မည်သူမျှအရှုံးခံလုပ်ကိုင်ကြမည်မဟုတ်။ စီးပွားရေးသဘောအရ အပြစ်တင်ရန်လည်းမရှိချေ။ သို့သော်အရှုံးပေါ်၍အခက်အခဲကြုံတွေ့နေချိန်၌ပင် ပြည်သူများ၊ ဆေးရုံဆေးခန်းများ၊ လူနာများဒုက္ခရောက်မည်ကိုမျှော်တွေး၍ပရဟိတစိတ်ထားအရ အနစ်နာခံဆောင်ရွက်ပေးကြရန် လုပ် ငန်းရှင်အသင်းအဖွဲ့တစ်ခုက မေတ္တာရပ်ခံခြင်းကမူ မိမိတို့နိုင်ငံ၌ပျောက်ကွယ် နေသည့်ဗြဟ္မာစိုရ်တရားကိုမထင်မှတ်ဘဲပြန်လည်မြင်တွေ့ရသည့်အလားခံစားမိပေသည်။


သို့ဖြစ်ပေရာ ဤအခြေအနေကိုအခြေပြု၍ လက်ရှိအချိန်၌ ပြည်တွင်း စီးပွားရေးနယ်ပယ်ကဏ္ဍတိုင်းမှတာဝန်ရှိ အသင်းအဖွဲ့များနှင့် သက်ဆိုင်ရာဝန်ကြီးဌာနအစိုးရအဖွဲ့တို့မဖြစ်မနေ တွေ့ဆုံဆွေးနွေးပြီး လက်ရှိကြုံတွေ့နေသည့် ကုန်ဈေးနှုန်းကြီးမြင့်လာမှုအပါအဝင်ပြည်သူတို့၏အခက်အခဲများကို ဖြေရှင်းနိုင်မည့်နည်းလမ်း၊ အစီအမံတို့အားတိုင်းပြည်အကျိုးမျှော်ကိုး၍အတူတကွ ပူးပေါင်းလက်တွဲကာ အမြန်ဆုံးအဖြေရှာဆောင်ရွက်ရန်လိုပြီဖြစ်ပါကြောင်း ဒီမိုကရေစီတူဒေးသတင်းစာက တိုက်တွန်းရေးသားလိုက်ရပေသည်။

အယ်ဒီတာ (စက်တင်ဘာ ၂၁၊ ၂ဝ၁၈)

#democracytoday

Rate this item
(0 votes)
back to top