Friday, 12 January 2018 14:43

ဧည့်စာရင်းတိုင်မှ ထောက်ခံစာ ရမည်

Written by ဖိုးရာဇာ(မအူပင်)
Rate this item
(0 votes)

ဖိုးရာဇာ(မအူပင်)

********************

ရပ်ကွက် (သို့မဟုတ်) ကျေးရွာအုပ်စု အုပ်ချုပ်ရေးဥပဒေကို ၂ဝ၁၂ ခုနှစ် ဖေဖော်ဝါရီလ ၂၄ ရက်နေ့တွင် ပထမအကြိမ် ပြည်ထောင်စုလွှတ်တော်က (၂ဝ၁၂ ခုနှစ် ပြည်ထောင်စုလွှတ် တော်ဥပဒေအမှတ်-၁) အဖြစ်ပြဋ္ဌာန်းခဲ့ပါသည်။ အဆိုပါဥပဒေ အခန်း(၉) ရပ်ကွက် သို့မဟုတ် ကျေးရွာအုပ်စုအတွင်းနေထိုင်သူ ၏ တာဝန်ဝတ္တရားများအခန်း၊ ပုဒ်မ။ ၁၇ တွင် အောက်ပါအတိုင်း ပြဋ္ဌာန်းထားသည်ကို တွေ့ရပါသည်။ ပုဒ်မ။ ၁၇။ ရပ်ကွက် (သို့မဟုတ်) ကျေးရွာအတွင်းနေထိုင်သူသည် အောက်ပါကိစ္စတစ်ရပ်ရပ်ပေါ်ပေါက်ပါက သက်ဆိုင်ရာရပ်ကွက် သို့မဟုတ် ကျေးရွာအုပ်စုအုပ်ချုပ်ရေးမှူးထံ သတ်မှတ်ချက်များနှင့်အညီ တိုင်ကြားရမည်။


(က) အခြားရပ်ကွက် သို့မဟုတ် ကျေးရွာအုပ်စုတစ်ခုခု တွင်နေထိုင်ပြီး မိမိအိမ်ထောင်စုစာရင်းဝင်မဟုတ်သူကညဥ့်အိပ် ညဥ့်နေဧည့်သည်အဖြစ် လာရောက်တည်းခိုခြင်း။ (ခ) မိမိထံလာရောက်တည်းခိုသော ဧည့်သည်ပြန်လည် ထွက်ခွာသွားခြင်း။ အထက်ပါဥပဒေပြဋ္ဌာန်းချက်ကို လိုက်နာဆောင်ရွက်ရန် ပျက်ကွက်ပါကလည်း ပုဒ်မ ၂၇ ပါပြဋ္ဌာန်းချက်အရ ထိုသူကိုကျပ် ငါးထောင်ထက်မပိုသော ငွေဒဏ်ကိုချမှတ်ရမည်။ ငွေဒဏ်ပေး ဆောင်ရန်ပျက်ကွက်ပါက ခုနစ်ရက်ထက်မပိုသော ထောင်ဒဏ်ကျခံစေရန် သက်ဆိုင်ရာတရားရုံးက ချမှတ်ရမည်ဟု ပြဋ္ဌာန်းထားခဲ့ပါသည်။ သို့ရာတွင် ၂ဝ၁၆ ဒီဇင်ဘာလ ၂ ရက်နေ့က ပြည် ထောင်စုလွှတ်တော်မှပြဋ္ဌာန်းခဲ့သည်။ ''ရပ်ကွက် သို့မဟုတ် ကျေးရွာအုပ်စုအုပ်ချုပ်ရေးဥပဒေကို တတိယအကြိမ်ပြင်ဆင်သည့် ဥပဒေ''အရ မူလပြဋ္ဌာန်းထားခဲ့သည်။ ပုဒ်မ။ ၁၇။ ကို အောက်ပါအတိုင်းအစားထိုးပြဋ္ဌာန်းခဲ့ပါသည်။


ပုဒ်မ။ ၁၇ ။ ရပ်ကွက်သို့မဟုတ် ကျေးရွာအုပ်စုအတွင်း တစ်လနှင့်အထက်ကျော်လွန်၍ လာရောက်တည်းခိုနေထိုင်သူများရှိပါက မှတ်တမ်းထားရှိနိုင်ရန်အတွက် သတ်မှတ်နည်းလမ်းများနှင့်အညီ သက်ဆိုင်ရာတာဝန်ရှိသူထံ အသိပေးအကြောင်းကြားရမည်။ ထိုပြင်ဆင်ပြဋ္ဌာန်းချက်ကြောင့် ဧည့်စာရင်းတိုင်စရာမလို တော့ဘဲ တစ်လနှင့်အထက်နေထိုင်သူများကိုသာ မှတ်တမ်းထားရှိ နိုင်ရန် သက်ဆိုင်ရာသို့ အသိပေးအကြောင်းကြားရမည်ဟုသာပါရှိခဲ့ပါသည်။ ယခင်ပုဒ်မ။ ၁၇။ ကို မလိုက်နာပျက်ကွက်ပါက ပြစ်ဒဏ်ပေးခြင်းကိုလည်း ပယ်ဖျက်ပေးခဲ့ပါသည်။ ထို့ကြောင့် ရပ်ကွက်ကျေးရွာနေပြည်သူတို့အနေဖြင့် ဧည့် စာရင်းမတိုင်ရတော့ဘူးဆိုသည့် အချက်ကိုသာမှတ်သားပြီး ရပ်ကွက်ကျေးရွာအုပ်စု အုပ်ချုပ်ရေးမှူးရုံးနှင့် အဆက်ဖြတ်လိုက် ကြတော့သည်။ ပုဒ်မ။ ၁၇။ ပါပြင်ဆင်ပြဋ္ဌာန်းချက်ကို သိရှိလိုက် နာဆောင်ရွက်ရန် အလေးမထားကြတော့ပေ။ တစ်လနှင့်အထက် နေထိုင်သော အိမ်ရှင်၊ အိမ်ငှား၊ အဆောင်နေသူတို့အနေဖြင့် သက်ဆိုင်ရာတာဝန်ရှိသူထံ အသိပေးအကြောင်းကြားရမည်ဆိုသည်ကို လျစ်လျူရှုခဲ့ကြလေသည်။


ဤကဲ့သို့နေထိုင်ရင်း အလုပ်အကိုင်၊သာရေး၊ နာရေးတို့နှင့်ပတ်သက်ပြီး သက်ဆိုင်ရာရပ်/ကျေးအုပ်ချုပ်ရေးမှူး၏ ထောက်ခံချက်လိုသည့်အခါ အုပ်ချုပ်ရေးမှူးရုံးက နေထိုင်ကြောင်းမှတ်တမ်းမှတ်ရာ အထောက်အထားမရှိသဖြင့် ထောက်ခံစာမပေးနိုင်ဟုဆိုလာသည်။ ထိုအခါထောက်ခံစာရယူလိုသူတို့အခက်အခဲဖြစ် ကြရပြီး အုပ်ချုပ်ရေးမှူးရုံးအပေါ် အမြင်မကြည်မှုများဖြစ်လာသည်။ ပြင်ဆင်ပြဋ္ဌာန်းချက်ကိုမူ သိရှိသူမရှိ။ ရှိလျှင်လည်း နည် သည်။ ကျေးရွာရပ်ကွက်အတွင်း အိမ်ငှားသည်ဆိုလျှင်လည်း လချုပ်နှင့်ငှားရသဖြင့်အနည်းဆုံးသုံးလ၊ ခြောက်လစသည့်ဖြင့် စာချုပ်ချုပ်ကြရသည်။ အဆိုပါစာချုပ်အရ တစ်လနှင့်အထက် နေထိုင်သူဖြစ်နေပြီဖြစ်သည်။ ဥပဒေပုဒ်မ။ ၁၇။ အရ မှတ်တမ်း မှတ်ရာထားရှိနိုင်ရန် သက်ဆိုင်ရာ ရပ်/ကျေးအုပ်ချုပ်ရေးမှူရုံးသို့ အသိပေးအကြောင်းကြားရမည်ဖြစ်သည်။ သို့သော် နေထိုင်သူတို့ပျက်ကွက်ခဲ့သည်။


ရပ်ကွက်ထဲတွင် အိမ်ငှားသည်ဖြစ်စေ၊ ဝယ်သည်ဖြစ်စေ၊ အဆောင်ငှားသည်ဖြစ်စေ၊ ငှားရမ်းဝယ်ယူနေထိုင်သော စာချုပ်စာတမ်း မူလနေထိုင်ရာဒေသမှ အိမ်ထောင်စုစာရင်း၊ ထောက်ခံစာ၊ နိုင်ငံသားစိစစ်ရေးကတ်စသည်တို့ဖြင့် သက်ဆိုင်ရာအုပ်ချုပ်ရေးမှူးရုံးသို့ သွားရောက်အသိပေးအကြောင်းကြားပါက အုပ်ချုပ်ရေးမှူးရုံးမှ နေထိုင်သူ၏မှတ်တမ်းမှတ်ရာ များကိုရေးမှတ်ပြီး တစ်လ၊ သုံးလစသည်ဖြင့် ဧည့်စာရင်း ပုံစံထုတ်ပေးလိုက်မည် ဖြစ်ပါသည်။ ထိုဧည့်စာရင်းပုံစံရရှိပါက သက်ဆိုင်ရာရပ်ကွက်အတွင်း နေထိုင်သူဖြစ်သွားပြီး အလုပ်အကိုင်၊ သာရေး၊ နာရေးစသည်ဖြင့် အကြောင်းရှိပါက အုပ်ချုပ်ရေးမှူး၏ထောက်ခံစာကို အလွယ်တကူ ရယူနိုင်မည်ဖြစ်ပါသည်။ ထို့အတူ အကြောင်းတစ်စုံတစ်ရာရှိပါကလည်း ကူညီဆောင်ရွက်ပေးနိုင်မည်ဖြစ်ပါသည်။ အိမ်ထောင်စုပုံစံ ၆၆/၆ ဖြင့် နေထိုင်သူများ အနေဖြင့်တိုင်ကြားရန်မလိုပါ။


ဖွဲ့စည်းပုံအခြေခံဥပဒေပုဒ်မ ၃၅၅ ပါပြဋ္ဌာန်းချက်အရ ''နိုင်ငံသားတိုင်းသည် ပြည်ထောင်စုသမ္မတမြန်မာ နိုင်ငံတော်အတွင်း မည်သည့်အရပ်ဒေသ၌မဆို၊ ဥပဒေနှင့်အညီ အခြေစိုက်နေထိုင်ခွင့်ရှိသည်''ဟု ပြဋ္ဌာန်းထားပါသည်။ မည်သည့်ဒေသ၌မဆို အခြေစိုက်နေထိုင်ခွင့်ရှိသည်ဆိုသော်လည်း ''ဥပဒေနှင့်အညီ'' သာနေထိုင်ကြရမည်ဖြစ်ပါသည်။ ရပ်/ကျေးအုပ်ချုပ်ရေးဥပဒေ ပုဒ်မ-၁၇ ပါပြဋ္ဌာန်းချက်သည် ဥပဒေပင်ဖြစ်ပါသည်။ ထို့ကြောင့် လိုက်နာဆောင်ရွက်ရန်တာဝန်ရှိပါသည်။ မလိုက်နာပျက်ကွက် ပါကလည်း မည်သို့အရေးယူရန် တစ်စုံတစ်ရာပြဋ္ဌာန်းထားခြင်း မရှိပေ။ ထို့ကြောင့် မသိသလိုနေလာခဲ့ကြခြင်းဖြစ်သည်။ သို့သော်အကြောင်းတစ်စုံတစ်ရာရှိလာပါက သက်ဆိုင်ရာရပ်/ကျေးအုပ်ချုပ် ရေးမှူး၏ အသိအမှတ်ပြုထောက်ခံမှုရယူရန် ခက်ခဲမည်ဖြစ်ပါသည်။ သို့ပါ၍ ရပ်ကွက်ကျေးရွာအုပ်စုအတွင်း တစ်လနှင့် အထက် နေထိုင်မည့်သူများအနေဖြင့် ဥပဒေပါပြဋ္ဌာန်းချက်နှင့်အညီ သက်ဆိုင်ရာ ရပ်/ကျေးအုပ်ချုပ်ရေးမှူးများထံသို့ အသိပေး အကြောင်းကြားရန်လိုအပ်မည်ဖြစ်ပါကြောင်း အကြံပြုရေးသားလိုက်ရပါသည်။ ။

 

ဖိုးရာဇာ(မအူပင်)

#democracytoday

Read 1647 times
Login to post comments