HIGHLIGHT NEWS
Main menu

Political News [-- နိုင်ငံရေးသတင်းများ --]

၂ဝ၁၉ စင်မြင့်ပေါ်က နိုင်ငံရေး အခင်းအကျင်း

၂ဝ၁၉ စင်မြင့်ပေါ်က နိုင်ငံရေး အခင်းအကျင်း

ရန်ကုန်

၂၀၁၈ ခုနှစ်ဟူသည့် နှစ်ဟောင်းကုန်၍ ၂ဝ၁၉ ခုနှစ်ဟူသည့် နှစ်သစ်သို့ကူးပြောင်းလာပြီဖြစ်သည်။ နှစ်ဟောင်းကာလအတွင်း အစိုးရအနေနှင့် ပြည်သူများအတွက် ဦးစားပေးကဏ္ဍများ ဆောင်ရွက်ရန် ပြောဆိုမှုများပြုလုပ်ခဲ့ကြသည်။ ယင်းတို့မှာ တိုင်းရင်းသားအရေး၊ ပြည်တွင်းငြိမ်းချမ်းရေး၊ အာမခံချက်ပေးနိုင်မည့် ဖွဲ့စည်းပုံအခြေခံဥပဒေတစ်ရပ် ပေါ်ထွန်းရေး၊ ပြည်သူလူထုအား အကာအကွယ်ပေးနိုင်သည့် အုပ်ချုပ်မှုစနစ် ပေါ်ပေါက်လာရေးတို့လည်းပါဝင်ခဲ့သည်။ နှစ်ဟောင်းကာလတွင် မြန်မာနိုင်ငံအတွင်း၌ ဖြစ်ရပ်များစွာဖြစ်ပျက်ခဲ့ပြီး ပြည်သူအားရ ကျေနပ်ခဲ့သည့် အဖြစ်အပျက်များစွာ ရှိခဲ့သော်လည်း ပြည်သူများ အားရကျေနပ်မှုမရှိသည့် အဖြစ်အပျက်များစွာလည်းရှိခဲ့သည်။ ထို့အပြင် NLD အစိုးရအနေဖြင့် ၂ဝ၁၈ ခုနှစ်အတွင်း ပြောဆိုထားသည့် ခရီးလမ်းကြောင်းကို အပြည့်အဝ မရောက်ရှိသေးကြောင်းလည်း ဝေဖန်ပြောဆိုမှုများ ရှိနေသည်။

ထို့ကြောင့် နှစ်သစ်မှစတင်ကာ အစိုးရ၏ ကျန်ရှိသည့်ကာလအတွင်း စောင့်ကြည့်ရမည့် ကိစ္စရပ်များ၊ နှစ်ဟောင်းတွင် မပြီးပြတ်သေးသည့် ကိစ္စရပ်များ၊ နှစ်သစ်တွင် ဆောင်ရွက်ရမည့် ကိစ္စရပ်များ များစွာရှိနေသည်။ သို့သော် နိုင်ငံ တော်သမ္မတ ဦးဝင်းမြင့် အနေဖြင့်လည်း နိုင်ငံသူနိုင်ငံသားများ၏ဘဝများ ချမ်းမြေ့ပျော်ရွှင်နိုင်ရန် နိုင်ငံတော်အစိုးရက ကောင်းမွန်သည့် ရည်မှန်းချက်၊ ဦးတည်ချက်များကို ကြိုးစားပုံဖော်သွားမည်ဖြစ်ကြောင်း၊ နောင်လာမည့်နှစ်များ အတွင်း နိုင်ငံရေး၊ လူမှုရေး၊ စီးပွားရေးစသည့် ကဏ္ဍများတွင် အခွင့်အလမ်းကောင်းများ ပိုမိုရရှိလာမည်ဖြစ်ကြောင်း နှစ်သစ်နှုတ်ခွန်းဆက် စကားလည်းဆိုထားပြန်သည်။


''နိုင်ငံတော်မှာ တွေ့ကြုံနေရတဲ့ အကျပ်အတည်းအခက်အခဲများကိုလည်း အမှန်တရား နဲ့ တရားမျှတမှုကိုလက်ကိုင်ထားပြီး ဖြေရှင်းခြင်း ဖြင့် ကျော်လွှားလွန်မြောက်နိုင်မယ်လို့ ယုံကြည်ပါတယ်။ မိဘပြည်သူများအနေနှင့်လည်း နိုင်ငံ တော်အစိုးရရဲ့ ပြည်ထောင်စုကြီး ငြိမ်းချမ်းရေး၊ ဒီမိုကရေစီဖက်ဒရယ်ပြည်ထောင်စု တည်ဆောက် ရေးနဲ့ ဖွံ့ဖြိုးတိုးတက်ရေး စတဲ့လုပ်ငန်းစဉ်များ အပေါ် ပိုမိုပူးပေါင်းဆောင်ရွက်ပေးကြပါရန် ပန် ကြားအပ်ပါတယ်''ဟု နိုင်ငံတော်သမ္မတက ဆိုထားသည်။ နှစ်ဟောင်းအတွင်း ဖြစ်ပေါ်ခဲ့သည့် ကိစ္စရပ်များအနက် ၂ဝ၁၈ ဒီဇင်ဘာလတတိယပတ်အတွင်း ကြေညာခဲ့သည့် တိုင်းရင်းသားလက်နက်ကိုင်အဖွဲ့များနှင့် အပစ်အခတ်ရပ်စဲရေး၊ ငြိမ်းချမ်းရေးဆိုင်ရာများ ဆွေးနွေးနိုင်ရန်ဟုဆိုကာ တိုင်းစစ်ဌာနချုပ်ငါးခု၏ နယ်မြေများ၌ စစ်ရေးလှုပ်ရှားမှုအားလုံး လေးလကျော်ရပ်ဆိုင်းမည်ဆိုသည့် ကိစ္စရပ်မှာ ပြည်သူများအကြား ကြိုဆိုထောက်ခံမှု မြင့်တက်ခဲ့သည်။ သို့သော် ဇန်နဝါရီ ၄ ရက်တွင် AA လက်နက်ကိုင်အဖွဲ့ များက နယ်ခြားစောင့်ရဲကင်းစခန်းများကို ဝင် ရောက်တိုက်ခိုက်ခဲ့မှုဖြစ်စဉ်ကြောင့် ပြည်သူများ ၏စိုးရိမ်စိတ်ကို မြင့်တက်စေခဲ့ပြန်သည်။

 

po 1


သို့သော် အဆိုပါနေ့၌ပင် အမျိုးသားဒီမို ကရေစီအဖွဲ့ချုပ်သို့ တပ်မတော်ကာကွယ်ရေး ဦးစီးချုပ်က လွတ်လပ်ရေးနေ့ နှုတ်ခွန်းဆက်သဝဏ်လွှာပေးပို့ခဲ့မှုရှိခဲ့ပြီး ယင်းကဲ့သို့ သဝဏ်လွှာ ပေးပို့ခြင်းသည် ပထမဆုံးအကြိမ်ဖြစ်ခဲ့ခြင်း ဖြစ်ကာ ပြည်သူအများက ကြိုဆိုလက်ခံခဲ့ကြ သည်။ ''နိုင်ငံရဲ့ရှေ့ရေးအတွက် အကောင်းမြင်ပါ တယ်။ ကာကွယ်ရေးဦးစီးချုပ်ကိုယ်တိုင်ကိုယ်ကလည်း ၂ဝ၂ဝ အမီ ပြည်သူတွေလက်ထဲကို ငြိမ်း ချမ်းရေး အရောက်ပို့ပါမယ်ဆိုတဲ့ စကားလည်း ရှိတယ်။ ဒီအချက်တွေက ကာကွယ်ရေးဦးစီးချုပ်ရဲ့ နှုတ်ကတိနဲ့အညီ ဖြစ်ပေါ်လာတယ်လို့ မြင်ပါတယ်။ ဒီလိုပဲအပစ်အခတ်ရပ်စဲရေးကို ဆက်လက်ပြီးလုပ်နိုင်မယ်။ ဒီဟာဟာ နိုင်ငံရေး တွေ့ဆုံဆွေးနွေးမှုအတွက် လမ်းဖွင့်ပေးတာပဲ ဖြစ်ပါတယ်။ ဒီအခွင့်အရေးကို အသုံးချပြီးတော့ နိုင်ငံရေးဆွေးနွေးမှုတွေ လုပ်နိုင်မယ်ဆိုရင် သိသာထင်ရှားတဲ့ တိုးတက်မှုတွေ ရလာမယ်လို့ မျှော်လင့်ပါတယ်''ဟု အမျိုးသားဒီမိုကရေစီအဖွဲ့ ချုပ်ပါတီ ပြောခွင့်ရပုဂ္ဂိုလ် ဒေါက်တာမျိုးညွန့်က ပြောသည်။


ထို့အပြင် အေးချမ်းစွာ နေထိုင်လိုသည့် ပြည်သူများ၏ဆန္ဒ ပြည်စုံစေရန် လက်တွဲဆောင်ရွက်မည်ဟု တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်ကဆိုထားသည်။ ''လူသားအားလုံးဟာ မိမိဘဝတိုးတက်ဖို့ အတွက် လုပ်ကိုင်စားသောက်ဖို့ လိုအပ်ကြသလို အားလုံးဟာလဲ အေးအေးချမ်းချမ်းနဲ့ နေထိုင်လိုတဲ့ဆန္ဒ ရှိကြပါတယ်။ ဒီလူသားအားလုံးရဲ့ဆန္ဒ ပြည့်စုံစေဖို့အတွက် ကျွန်တော်တို့ တပ်မတော် အနေနဲ့ မိဘပြည်သူများအားလုံးနဲ့ လက်တွဲဆောင် ရွက်သွားကြမှာဖြစ်ကြောင်း ကျွန်တော် ပြော ကြားလိုပါတယ်''ဟု ဆိုထားသည်။ အဆိုပါအခြေအနေများသည် ပြည်တွင်း ငြိမ်းချမ်းရေးအတွက် ကောင်းမွန်သည့်လမ်းစ များ ဖြစ်သကဲ့သို့ ၂ဝ၁၈ ခုနှစ်အတွင်းက မပြီး ပြတ်ခဲ့သည့် ငြိမ်းချမ်းရေးလုပ်ငန်းစဉ်များနှင့် ပတ်သက်၍ ၂ဝ၁၉ ခုနှစ်အတွင်း မည်မျှတိုးတက် ပြီးအောင်ဆောင်ရွက်မည်လားဆိုသည်ကိုတော့ ဆက်လက်စောင့်ကြည့်ရန် လိုအပ်ကြောင်း နိုင်ငံ ရေးလေ့လာသုံးသပ်သူများက ဆိုကြသည်။

 

po 2


''အခု အခြေအနေကာလဟာ လွတ်လပ် ရေးကြိုးပမ်းမှုကာလလိုပဲ အမျိုးသားပြန်လည် သင့်မြတ်ရေးကို ကြိုးပမ်းပြီး တစ်ဖက်ကနေ ၂၁ ရာစုပင်လုံညီလာခံကြီးကို ကျင်းပဆောင် ရွက်နေတဲ့ကာလ ဖြစ်တယ်။ ဒီကာလမှာ ကျွန် တော်တို့တိုင်းပြည်ရဲ့ငြိမ်းချမ်းရေးဟာ မရှိမဖြစ် လိုအပ်ပါတယ်''ဟု ရန်ကုန်တိုင်းဒေသကြီးဝန် ကြီးချုပ် ဦးဖြိုးမင်းသိန်းက ဆိုသည်။ ယင်းအပြင် ၂ဝ၁၉ ခုနှစ်အတွင်း ထပ်မံ စောင့်ကြည့်ရမည့် အချက်များအတွင်း၌ ပြည်ထဲ ရေးဝန်ကြီးဌာန လက်အောက်တွင် နှစ်ရှည်လ များရှိခဲ့သည့် အထွေထွေအုပ်ချုပ်ရေးဦးစီးဌာန ကို ပြည်ထောင်စုအစိုးရအဖွဲ့ရုံးဝန်ကြီးဌာနအောက် သို့ ပြောင်းရွှေ့ခဲ့ခြင်းမှာလည်း ပါဝင်နေသည်။


ပြည်ထဲရေးဝန်ကြီးဌာနအောက်တွင် ရှိခဲ့သည့် ဌာနတစ်ခုကို ပြောင်းရွှေ့ခြင်းဖြစ်သည့် အတွက် လုပ်ထုံးလုပ်နည်းများအရ ကြန့်ကြာမှုများရှိနိုင်ကြောင်း ခန့်မှန်းခဲ့ကြသော်လည်း ဒီဇင်ဘာ ၂၈ ရက်၌ ပြုလုပ်သည့် ပြည်ထောင်စု အစိုးရအဖွဲ့ အစည်းအဝေး ဆုံးဖြတ်ချက်အရ ထွေအုပ်သည် ပြည်ထောင်စုအစိုးရအဖွဲ့ရုံး ဝန်ကြီးဌာနအောက်သို့ ရောက်ရှိခဲ့သည်။ ''နှစ်သစ်အတွက် သတင်းကောင်းထဲမှာ ထွေအုပ်သတင်းလဲပါတယ်။ ၂ဝ၁၉ ခုနှစ်အတွက် ကောင်းမွန်တဲ့ နှစ်စပေါ့။ ဒါပေမဲ့ ၂ဝ၁၉ ခုနှစ် အထဲမှ ပြုပြင်ပြောင်းလဲမှု သေချာလုပ်ဖို့တော့ လိုတယ်။ သမ္မတ၊ ပြည်ထောင်စုအစိုးရအဖွဲ့ရုံး၊ ဝန်ကြီးချုပ်တွေနဲ့ အထွေထွေအုပ်ချုပ်ရေးဦးစီး ဌာနတို့ ချိတ်ဆက်ပြီး အုပ်ချုပ်ရေးယန္တရားကို သွက်သွက်လက်လက်နဲ့ ၂ဝ၁၉ ခုနှစ်အတွင်း မှာ ပြည်သူအတွက် ဘယ်လိုဆောင်ရွက်ပေး နိုင်မလဲဆိုတာတော့ စိတ်ဝင်စားဖို့ကောင်းတယ်'' ဟု နိုင်ငံရေးလေ့လာသုံးသပ်သူတစ်ဦးဖြစ်သည့် ဦးမင်းစိန်က ဆိုသည်။


ထပ်မံပြီး စိတ်ဝင်စားစရာတစ်ချက်အနေ နှင့် ရခိုင်ပြည်နယ်မြောက်ပိုင်းမှ နေရပ်စွန့်ခွာ သူများကိစ္စရပ်မှာလည်း ရှိနေသေးသည်။ ပြီး ခဲ့သည့်နှစ်အတွင်း နေရပ်စွန့်ခွာသူများကို ပြန် လည်လက်ခံရန် သဘောတူညီမှုများရရှိခဲ့သော် လည်း မျှော်သလင့်သလို ဖြစ်လာခဲ့ခြင်းမရှိပေ။ နေရပ်စွန့်ခွာသူများ ပြန်လည်ဝင်ရောက်မလာ ခြင်းနှင့်အတူ မြန်မာနိုင်ငံအပေါ်သို့ အနောက် နိုင်ငံများ၏ ဖိအားပေးမှုများမှာ တဖြည်းဖြည်း မြင့်တက်လာခဲ့သည်။ ထို့ကြောင့် ၂ဝ၁၉ ခုနှစ်အတွင်း နေရပ် စွန့်ခွာသူများကို ပြန်လည်လက်ခံရေးမှာ မြန်မာ အစိုးရ၏ ဦးစားပေးအချက်များအတွင်း ပါဝင် လာနိုင်ပြီး နေရပ်စွန့်ခွာသူများကို ဘင်္ဂလား ဒေ့ရှ်၏ အထွေထွေရွေးကောက်ပွဲအပြီးတွင် ဆက်လက်ဆွေးနွေးမည်ဟု မြန်မာအစိုးရနှင့် ဆွေးနွေးထားမှုလည်း ရှိနေသည်။ အထက်ပါကိစ္စရပ်များကဲ့သို့ပင် ၂ဝ၁၈ ခုနှစ်အတွင်း၌ ဝန်ထမ်းရေးရာကိစ္စများ၊ အလုပ် သမားရေးရာကိစ္စများ၊ ၂ဝဝ၈ ဖွဲ့စည်းပုံအခြေခံ ဥပဒေကိစ္စရပ်များ အပါအဝင် နိုင်ငံရေးကဏ္ဍ အတွင်း မပြီးပြတ်သေးသည့် ကဏ္ဍများစွာရှိ သည့်အတွက် ၂ဝ၁၉ ခုနှစ်သည် ဂရုတစိုက် ဆောင်ရွက်ရမည့်အခြေအနေတွင် ရှိနေသည်။

 

po 3


''၂ဝ၁၉ ခုနှစ်က ယှဉ်ပြိုင်မှုတွေပြင်းထန် လာပြီးတော့ အကဲဆတ်မယ်လို့ထင်တယ်''ဟု ရှမ်းတိုင်းရင်းသားများဒီမိုကရေစီအဖွဲ့ချုပ်ပါတီ အထွေထွေအတွင်းရေးမှူး ဦးစိုင်းညွန့်လွင်က ဆိုထားသည်။ သို့ဖြစ်ပါ၍ ၂ဝ၁၉ ခုနှစ်အတွင်း အစိုးရ အပေါ် ပြည်သူလူထု၏မျှော်မှန်းချက်များ ကြီးမား လျက်ရှိနေသော်လည်း အမျိုးသား ဒီမိုကရေစီ အဖွဲ့ချုပ်အနေဖြင့် ပြည်သူလူထု၏ ယုံကြည်မှု၊ မျှော်လင့်ကိုးစားမှု၊ တစ်ခဲနက်ထောက်ခံမှုဖြင့် နိုင်ငံတော်အား တာဝန်ယူ၊ တာဝန်ခံခွင့် ရရှိခဲ့ သော်လည်း တစ်ဆက်တည်းမှာပင် ဘက်ပေါင်းစုံ ဖိအားများနှင့် စိန်ခေါ်မှုများ၊ အကျပ်အတည်း များကို ရင်ဆိုင်ရုန်းကန်နေရဆဲဖြစ်ကြောင်း သိရသည်။ ''တစ်ခုလေး မေတ္တာရပ်ခံချင်တာကတော့ ပြည်သူလူထုအများစုဟာ နတ်ရေကန်ထဲပစ်ချသလိုမျိုး အပြောင်းအလဲကို အစိုးရသစ်လက် ထက်မှာ မျှော်လင့်နေကြပါတယ်။ ဒါမျိုးဖြစ်နိုင် ဖို့ကတော့ အင်မတန်ကို အခွင့်အလမ်းနည်း ပါတယ်''ဟု မကွေးတိုင်းဒေသကြီးဝန်ကြီးချုပ် ဒေါက်တာအောင်မိုးညိုက ဆိုသည်။


လက်ရှိကာလတွင်လည်း နိုင်ငံတော်အနေ နှင့် အခက်အခဲများ ကြုံတွေ့နေရသည်ကိုလည်း ''နိုင်ငံဟာ အခုအချိန်ကာလမှာ အခက်အခဲအမျိုးမျိုးနဲ့ ရင်ဆိုင်ကြုံတွေ့နေရတဲ့ စိန်ခေါ်မှု တွေကို ကျော်ဖြတ်ဖို့ ကြိုးပမ်းဆောင်ရွက်နေရတဲ့ အချိန်ကာလ ဖြစ်ပါတယ်။ ဒီအချိန်ကာလမှာ မြန်မာနိုင်ငံအတွင်းမှာ မှီတင်းနေထိုင်နေကြတဲ့ တိုင်းရင်းသားလူမျိုးပေါင်းစုံကြားမှာ သွေးစည်း ညီညွတ်မှု လိုအပ်ပါတယ်''ဟု ဦးဖြိုးမင်းသိန်းကဆိုသည်။ ထို့အပြင် ၂ဝ၁၉ ခုနှစ်တွင် မြန်မာနိုင်ငံရှိ တိုင်းရင်းသားညီအစ်ကို မောင်နှမများအားလုံး အပြစ်ကင်းသော ချစ်ခြင်းတရားများဖြင့် ယုံကြည် မှုတည်ဆောက်၍ ငြိမ်းချမ်းသောနိုင်ငံတော်ကြီး အဖြစ် ပူးပေါင်းတည်ဆောက်ကြရန်၊ မတူညီ ကွဲပြားမှုကို ခွန်အားအဖြစ်အသုံးချကာ ကျဉ်း မြောင်းသောအယူဝါဒကို စွန့်လွှတ်ပြီး တိုးတက် ကြီးပွားသော နိုင်ငံတော်ကြီးဖြစ်အောင် ဆောင် ရွက်ကြရန်လိုအပ်ကြောင်း စတော့ဟုမ်း ကမ္ဘာ့ ငြိမ်းချမ်းရေးဆုရှင် IBEC ဆရာတော်ကဆိုသည်။


သို့ဖြစ်ပါ၍ နိုင်ငံတော်အစိုးရအနေနှင့် နိုင်ငံတကာဖိအားများအကြားမှ ပြီးခဲ့သည့် နှစ် ဟောင်းကာလအတွင်း အောင်မြင်မှုအချို့ ရှိခဲ့ သော်လည်း အကောင်အထည်မဖော်နိုင်ခဲ့သည့် ကိစ္စရပ်များလည်း ရှိနေခဲ့ပေသည်။ ထို့ကြောင့် ၂ဝ၁၉ ဟူသည့် နိုင်ငံရေးစင်မြင့်ပေါ်တွင် ယခင် ကာလအတွင် မပြီးပြတ်သေးသည့် ကိစ္စရပ်များ နှင့် ပြည်သူများ၏ လိုလားချက်များကို ပြီးပြည့်စုံစွာအကောင်အထည်ဖော်နိုင်မည်လား ဆို သည်မှာတော့ စိတ်ဝင်စားစရာ ကောင်းလှပေသည်။ 

အာကာထက်

#theyangontimes

Rate this item
(0 votes)
back to top